林鄭在7月31日宣佈延遲立法會選舉，押後一年，聲稱純粹係為咗新冠肺炎疫情蔓延，絕無政治考慮，唔知有幾多香港人相信呢？新加坡總理李顯龍指：香港與新加坡一直有良性競爭，如今新加坡如期舉行選舉，相反香港押後選舉，對香港在國際市場的形象勢必受損。（見hket網，2020/07/31，18.31）
香港怕疫情惡化，唔敢選舉，同新加坡點比較？8月4日所見數字，新加坡有累積確診53346宗，增295宗，全世界排第43，香港累積有確診3670宗，全世界排第109，新加坡確診比香港多14倍以上，每日增加宗數比香港多兩三倍，而新加坡人口比香港少四分之一，即係於新加坡之人均確診比香港高得多，疫情更嚴重得多，點解新加坡可以如期舉行大選，而香港不能？藍絲唔用腦，人云亦云引用英國及其他地方延遲選舉，其實人地延遲係要經過國會或議會辯論，投票通過先至成事，即係人地延遲係要經過一番程序，民意代表同意，相反香港就由林鄭會同行政會議（一個已成為凡事必服從嘅組織）說了就算，一聲動用緊急條例，跳過立法會，即送上北京由人大常委決定一切，完全忽視香港有一個立法會。
林鄭自我破壞香港自治制度，雙手奉上高度自治承諾予人大常委，跪地求請指示，真不知有何動機，點解唔向本港立法會建議押後選舉，由立法會通過呢？實數夠票㗎，泛民反對都冇用嘅啫，不作此圖，而直接跪請北大人賜旨，夠晒肉酸。
其實選舉主任已經夠晒識做，係咁DQ參選人，為建制派參選人掃除路障，但仍然有人怕輸，可見心怯到腳震！好嘞，明年有冇得選呢？假如明年9月再選，建制派有無必勝把握？講政治，一日都嫌長，怎知明年9月之前，會有甚麼事情發生，紫微斗數大師，風水大師都預測唔到。假如有臨時或緊急立法會，（當然係建制派控制晒）在未來一年做唔到甚麼合乎民意之事，假若林鄭政府之離地作風延續，（例如去郊野公園食飯），明年泛民是但搵個新人出嚟都可能撼贏陳克勤，梁美芬之類！唔好以為押後一年可挫泛民銳氣，未來一年，林鄭與建制派勢將孭上空前未有之心理壓力，隨時翻艇！