英超球星時不時都會錯手將一啲唔出得街嘅片放上網，唔小心撳錯又好，迷迷糊糊唔知情又好，條片擺上網後就等於通天。今次輪到李斯特城中場占士麥迪臣，好彩佢上載至ig嘅片只係同囡囡錫錫，唔係嘅話就大鑊了。
英超煞科後去咗西班牙度假勝地伊維薩島玩嘅麥迪臣，禮拜一喺個人ig上載咗條片，見到佢同女伴喺漆黑嘅環境下，唔知佢係興奮過度定係啱啱瞓醒，見到佢向住隔籬紅色低胸裙嘅鬼妹，咀完面珠墩再咀佢嘴唇。之後，個靚女就輕輕捉住麥迪臣條頸，笑住推開佢，仲話：「呢啲唔po得喺你ig啊！」跟住麥迪臣就縮開，冇耐仲刪除埋條片。
麥迪臣上禮拜先同英格蘭國家隊隊友迪利阿里同基亞利殊，去咗伊維薩島一間酒吧蒲，仲同一班靚女喺沙灘開P鬼咁親密。放假去玩好正常，不過保持社交距離似乎安全啲喎，西班牙當局仍然實施防疫措施，都係謹慎啲好。