朋友外地私訊來問香港怎樣了。我答幾好呀，冇呃人。武肺雖然唔識睇鐘，六點以後照出來交大家叉感染。不過病毒極精伶，嗅到國家隊馳援的震懾味道，即刻與三位數確診數字割席，回歸雙位數。
「真係咁靈？」朋友半信半疑。看到葛議員指控亞博館竟然任由自由神像橫行，篤眼篤鼻至不得不除之而後快，大家少擔心就好。風水這一瓣，葛博士要去夏威夷大學再讀多個博士回來才有發言權。自由神像雖然只係掛牆的裝飾畫，只要義和團一郁手，外商聯軍卻步，亞博淪為新田購物城，鄭市長還能跣低口罩嗤之以鼻？朋友斬亂我歌柄，追問呢輪係咪好多人拎BNO走人。我唔識照腸，但估都估到，走頭嘅以藍絲居多，葉劉個黨搏命貶低這個5+1計劃無非係留住藍絲鐵票。可惜奸有奸輸，阿爺齋聽曾公與譚公支笛，選舉延期，藍票西流，大灣區那些光頭蛇五毛粉，點會投俾佢，繼區會後，等住二次滅黨。
朋友再問，點睇慈雲山醫院。朋友有限的中文鬧笑話了，亞博館旁那個臨時醫院正確命名叫做習神山。地盤工人踎街食飯盒時瘋傳奠基前會深埋一件習帝的隨身物辟邪，工人打賭是底褲，有人猜是condom。嘩，有帝皇精兵鎮守，冇得輸了。