來季英超最後一個席位終於有結果喇！禮拜二英冠升班附加賽決賽，富咸喺溫布萊球場鬥賓福特，全靠祖爾拜仁離門40碼直射罰球入網，最終富咸加時以2:1擊敗賓福特，降班一年後即重返英超，至少穩袋1.35億鎊（約13.68億港元）嘅收入，下季柏加仲可以惡鬥前隊友林柏特，上演倫敦打吡呢！
呢場價值連城嘅賽事，由有多名前英超兵壓陣嘅富咸，迎戰73年嚟都未試過升上頂級聯賽嘅賓福特，唔知係咪呢場波事關重大，兩隊都好謹慎，法定時間互冇紀錄，要加時分勝負。點知到加時第105分鐘，富咸喺左路離門40碼獲得罰球，當時全世界都諗住祖爾拜仁會斬入禁區啦，就連賓福特門將大衛拉耶都係咁諗，咪企出啲諗住出迎打手槌解圍囉，點知祖爾拜仁癲到離門40碼直射近柱，大衛拉耶回唔切身，成功收死呢位今季英冠金手套得主。
領先一球嘅富咸乘勝追擊，加時下半場兩分鐘祖爾拜仁同阿歷山大米祖域撞牆後近門再建一功，就算賓福特喺最後一刻由達斯加特頭槌頂入追番球，都阻唔到富咸以2:1贏波，來季同比爾沙帶領嘅列斯聯，仲有比歷領軍嘅西布朗一齊上英超。據英媒報道，雖然受武漢肺炎影響英超球會收入，但電視轉播權嘅收入仍相當可觀，每間球會至少都會有8,000萬鎊收益，再按聯賽排名瓜分，前季英超包尾嘅哈特斯菲爾德都收到9,600萬鎊，連計其他升上英超後嘅商業收益，英媒推算富咸至少穩袋1.35億鎊。
賽後今場離門40碼射入罰球、梅開二度嘅功臣祖爾拜仁自然成為焦點，不過佢話自己唔係英雄，全靠領隊柏加一早教路：「我唔係英雄，而係今季同我哋一齊嘅每一個球迷。柏加話當對方門將企得離白界較遠就射近柱，我哋有練過㗎！」領隊柏加賽後亦承認，曾經要求祖爾拜仁留意對方門將嘅企位見機行事：「我同佢講呢個罰球位置有侵略性，可以用我哋練開嘅死球戰術，注意對方門將企位起腳，最終佢射入咗，我嘅團隊應記一功！」
就咁睇嚟，降班一季就可以帶隊重返英超，仲諗到遠距離罰球射門收死對手，柏加呢位前英超名將嘅領軍功力都有番咁上下，下季佢仲有可能同前車路士隊友，包括現任藍戰士領隊林柏特拗手瓜，同埋阿仙奴領隊阿迪達，爭奪英超最佳少帥嘅稱號呢！
