日前獵奇同人作品《多啦AV夢》喺網絡爆紅，唔少網民睇完都大叫想抹去記憶。微博之後將中國作者「禾野男孩」賬號停權，作者再刪帖，發聲明道歉話「大家共同維護一個綠色健康的上網環境」咁話。前眾志秘書長黃之鋒喺fb出文撐佢，呼籲大家關注中共審查作者嘅問題，但禾野男孩受到「社會主義鐵拳」重擊都繼續表忠，喺美國社交網站Twitter上載新插畫，寸黃之鋒「比屎尿屁更令人作嘔」，但之鋒冇反擊之餘，仲好同情佢，點解呢？
「如他不罵我，可能明天已在黑獄 」
禾野男孩喺美國社交網站Twitter上載新插畫寸之鋒，描繪疑似作者見到屎都安然食飯，直至見到「黃之夫」喺Twitter追蹤自己，即刻嘔咗出嚟，形容「這個世界總有一些比屎尿屁還令人作嘔的東西！」
見到作者咁嘅反應，之鋒冇嬲，仲喺fb貼文表示支持：「實情只為表忠避過刑罰。如他今天不罵我，很可能明天已在黑獄。 」仲祝佢一生平安。可惜網民唔理咁多，走去檢舉作者翻牆、傳播淫穢作品，一輪罵戰之後有人將作者手機、全名起晒底，嚇到佢關閉咗Twitter賬號。但仍然有人喺Twitter用「禾野男孩」之名冒充作者，作者已經喺微博澄清呢個唔係佢本人。
其實八方諗諗吓，作者如果唔係幫黃之鋒宣傳，又點會借故喺插畫創作入面加入黃之鋒嘅Twitter「社運人士」介紹頁面呢？大家更發現，作者工作房間入面吊住一隻被綁住嘅疑似維尼熊，似乎影射緊某領導人！
李八方