無綫前總經理鄭善強去年宣佈退休，今年1月1日開始辭任董事局執行董事職務，轉任董事局策略顧問至上月底，日前他向員工發信道別正式離開。鄭善強1989年3月加入無綫出任市場及營業部總監，但有知情人士向《蘋果》透露，他其實是高層權鬥之下的犧牲者：「幾年前佢俾李寶安（副主席）升咗上神枱，冇得再過問廣告部嘅事，然後李寶安搵咗以前喺亞視合作開嘅徐堅剛做顧問。鄭善強好似光緒皇俾人囚禁喺電視城冇得見客。跟住一路等到夠鐘退休，其實佢都係被迫走。」
對此鄭善強回覆《蘋果》時笑說：「唔同人有唔同睇法嘅。」無綫過去一年因受抵制令廣告收入大跌，他謂：「廣告嘅嘢我唔適合評論喇，我呢六個月做顧問，幫公司做咗份好詳盡嘅市場報告同建議書，但我唔可以透露，所以唔評論咁多。」