與特首年紀差不多，但讀書成績差好遠嘅地盤總監惡佬明於三十幾度炎熱天氣下，在地盤頂住暴烈陽光，周圍督住工人戴住口罩開工，唔好違反禁令；惡佬明嗌住：戴番口罩呀，嗌到喉都沙晒。戶外工作，仲要係粗重工夫，戴住口罩確係好難頂，但政府頒下命令，係唔係可以當冇到呢？照理警察亦怕事怕曬，唔會入地盤捉工人違反口罩令嘅，你估去巡黃店咁努力咩。但一旦真係有警察入到地盤捉人，為庫房增加罰款收入，地盤總監必定難辭其咎，犯上督促不力之罪，會畀公司追究。
惡佬明話：「叫人戴口罩都冇咁慘，最慘係午飯時間冇地方可去，人人食飯盒，張建宗叫人去郊野公園食，真係聰明絕頂，係佢同年年考第一嘅聰明人合力先至諗得出，夠膽講得出，唔知可唔可以請司長局長加特首嚟地盤在33度天氣下露天食飯盒呢？」有限聚令噃，點可以咁多人一齊吃飯？惡佬明話：「我有幾百個工人在地盤，一齊喺度食飯盒，算唔算犯法？」左丁山唔識答，要搵考第一嘅聰明女答。
原來考第一又真係叻啲嘅，可以做特首啦，又可以做國務卿。美國國務卿蓬佩奧係肥佬一名，貌似老粗，外形與克林頓時期嘅奧爾布賴特及小布殊之賴斯兩位女士差好遠，兩位女士係教授款。蓬佩奧就似白手興家土豪款。殊不知此君在西點軍校工程系第一名畢業，從軍做到captain（陸軍上尉），退役後入哈佛法律學院讀JD，做埋Harvard Law Review編輯之一，正是文武兼備，學歷好過我地特首，唔好睇少佢呀，咪以為佢頭大無腦，只係畀余茂春教佢講反共。
呢位識工程，識打仗，識法律，又競選過成為眾議員，做過CIA頭頭嘅肥佬，自發表「尼克遜圖書館」演講後，震動中國，中美互關對方領事館，更令中美關係緊張，內地為要宣揚反美，據報會在八月開拍抗美援朝電視劇，叫做「跨過鴨綠江」。抗美援朝呢件事，係史太林搵毛澤東笨，犧牲中國大量人力物力之歷史事件（參考馬鼎盛講解韓戰，千年一遇馬師曾75-76頁），但中共每逢反美季節，就會搬韓戰出嚟，完全唔敢面對蘇俄最鍾意搶中國土地之事實。