All Black FC顧名思義，全黑足球隊是也，大眾以為這支起初以非洲難民為對象的球隊班底清一色為黑人，誰知卻有華人黃俊傑在陣。這位非一般的教會傳道人近年積極投入All Black事務，近月又忽然躋身清潔工行業，大熱天時走上山頭在墓碑旁除草。人到中年，有人養尊處優、有人為口奔馳、有人甘心日曬雨淋，他說信仰教導他要望向孤兒寡婦等邊緣弱勢，「佢哋（非洲難民）更加需要有人支援，我就係其中一個囉，咁又唔係話好偉大嘅嘢。」
記者：洪量丰
攝影：董立華 部份圖片由受訪者提供
成立了五年的All Black FC有不少南亞裔成員，人人背影身形膚色類近，我初次旁觀訓練時，在看台上仔細看一遍場中球員才發現黃俊傑的存在，純綷因為他是場中唯一架上眼鏡的人。
All Black由非裔足球教練Medard Koya於2016年所創，他四處招攬居港非洲難民入隊受訓，期望足球訓練能成為同鄉孤苦生活的寄託。創隊數載，球隊在本地球圈薄有名氣，但人在異地，語言文化背景大相逕庭，而且足球落場碰撞多，比賽易生爭端，17年All Black於麥花臣球場友賽本地球隊，鬥波鬥出真火，比賽淪拳腳打鬥，最後要報警解決，甚至要出動警犬。那次衝突片段在網絡流傳，其時傳道人黃俊傑早於其他場合認識Medard，當時Medard人不在港，黃俊傑請纓幫忙，「當時搞到幾大件事，創辦人咁啱喺國內搞足球訓練，我就通知佢，話嚟緊睇吓有冇嘢幫到你啦，我可以同啲華人本地人溝通。」 接觸非洲人的契機實早已出現，有日黃俊傑收到陌生電話，有非洲難民來電查詢現金支援，「佢話冇錢想買嘢食，咁我當時未能夠即時滿足到，叫佢搵第二個，之後我個心乸住乸住，有人有需要我應即刻回應，呢件事擺咗喺我個心度。」
港青出身好波易融入
黃俊傑初與Medard接洽時原意「睇吓有冇嘢可以幫手」，但如欲融入，親身上場切磋交流更實際，「踢波啲人一落到去球場，見到你都踢到吓呢，個關係就自然好。」上陣難不倒他，他出身銀禧足球部，曾為香港青年軍成員，與後來成為港將的范俊業、潘文迪、陳志康等同期受訓。貫穿訪問，黃俊傑最常說的是「同行」二字，他笑說自己英語水平普通，球員又多說法語，足球雖是共通語言，但要建立關係，先要樂於參與，「完咗場佢哋會煮嘢一齊食，都唔知咩嚟嘅，醬汁加啲肉淋落啲飯度， 但佢見到你肯一齊食又唔會介意，慢慢就會熟落啲。」
過往黃俊傑曾到非洲烏干達當義工協助築路，在港他又抽身投入難民球隊，難免有人疑問，「啲朋友都會問，你好多波踢啦，關你咩事呢？」然而他指在港的異鄉人似近還遠，身影隱身於大眾目光之外，「有段《聖經》講話你要望向孤兒寡婦，但我哋再望邊緣啲嘅，佢哋連身份證都冇，佢哋更加需要有人支援。」球隊既立，但非洲人在港時遇種族、文化和語言挑戰，簡單如訂場已是障礙。他直言香港有心人極多，自己所作的絕不偉大，球隊創辦人Medard一人開荒尤值敬佩，「球隊唔多人，佢要負責拎晒啲嘢去球場，然後又拎番晒走，洗衫又係拎返屋企洗，一腳踢做晒為咗咩呢？佢一開始就係為咗一班一起身唔知可以做乜嘅同鄉，我喺佢身上學到堅持同埋執着。」
難忘獲邀遊巴基斯坦
即使每天一早黃俊傑在網上成功「爭場」，達成首要有場操練目標，但假如沒有比賽，每日苦練也枉然。奈可正規足總低級聯賽只限永久性居民註冊，以難民為骨幹的All Black不符標準，連坊間流行的私人聯賽亦沒有他們的容身之地，原因何在？黃俊傑說得坦白，「一來佢哋勁得滯，二嚟佢哋踢波埋身（體力化），華人就覺得好怕同佢哋踢會受傷。」All Black球員被貼上「茅」的負面標籤，加上語言溝通誤會，而且部份球員僅持「行街紙」（入境處發予留港者的擔保書），以往球隊比賽門路寥寥，黃俊傑的加入成為球隊與本地人之間的橋樑，「有時佢哋會覺得本地人特登留難，球場上一有爭執，好多時一跌落去就去咗歧視。」不過球隊無穩定收入，聯賽報名費動輒數萬，有時他也要先行墊支，「搵唔到人幫手支援，咁咪自己出住先。屋企人見我做得咁開心就叫我去做啦，當然前提係屋企經濟穩定。」
黃俊傑形容自己漸漸擔起類似領隊和經理人的角色，但他正職為基督教傳道人，部份球員則為穆斯林，會否因而有宗教衝突？他明言球隊講求共融，宗教背景絕不影響彼此關係。相較宗教文化，中外踢球文化差異更教他尷尬：「通常佢哋比賽入好多波，華人踢波入得咁上下就唔入啦，佢哋唔係，仲要『砰砰聲』係咁入，入完仲喺度跳舞慶祝，我幾唔好意思呀。」窘況可想而知，他說惟有放下舊我才能真正了解，「對住佢哋係要放低自己過往嘅做法，其實佢哋係好享受，好開心球隊入波，我有同啲球員討論不如畀人入1、2球開心吓，佢哋就唔係咁諗，覺得比賽盡全力有咩錯呀？佢話乜唔係我全力比賽，你就覺得好受尊重咩？」
近年All Black轉型，除續有難民成年隊操練外，同時開辦以少數族裔為主的足球青訓，青年軍報名人數近80人。球隊擴充規模，黃俊傑有時會兼任教練，由最初「幫吓手」變得分身不暇，教會正職亦轉為半職，但得到的總比失去多，例如他與青年球員混熟，有日隊員Shayan突邀請他同回巴基斯坦鄉下，他笑說：「你聽到巴基斯坦你都驚，成日聽到又炸彈又咩，我初頭以為佢講吓笑。」然而Shayan待他如貴賓為他打點一切，盛情難卻下黃俊傑隨他回鄉，最終對未知的擔憂一掃而空，「好多人都好擔心又叫我小心啲，但其實係一個好好嘅經驗，平時接收關於巴基斯坦資訊都係從媒體嚟，但親身接觸佢哋真係好友善。」
墳場除草體驗清潔工辛勞
操練時Shayan靜悄悄跟小記說，「佢（黃俊傑）係年紀大咗咋，但係佢好好波、好靈活。」黃俊傑身段的確放得很靈活，疫情期間他偶爾到垃圾站派口罩予清潔工，想更了解及認識清潔工人，碰巧有朋友開設清潔公司，他毛遂自薦當兼職，每周一天上山到墳場工作，「真係好辛苦，夏天講緊日頭去到35度，有時又有驟雨，淋濕完又乾又濕繼續做。」
穿上裇衫的他在鏡頭前言談不免拘謹，我猜在山頭隱姓埋名與基層相處最叫他自在，「佢哋5、60年嘅人生好多嘢講，有個叔叔話好擔心我呢個後生仔，話份糧唔夠我用，問我做乜喺呢度做呀，將來冇乜發展，聽完之後都覺得好感動。」他在教會和球隊擔任管理層，不諱言習慣居高看待事物，穿上清潔工制服地位恰好相反，「我呢啲年紀睇嘢都係從上睇向下，好少會落番去一啲基層，𠵱家係好大嘅反差，我做嘢慢少少又會俾阿叔鬧。」連日拍攝，從教堂走到球場，再獨上荒蕪的墳場，他秉持與弱勢同行的信念，「有一個好核心嘅共通點就係同在、現身，我要出現，我唔出現咩都係假，我哋講信仰道成肉身，成個人喺度，唔係得閒出現吓、架空幫手做文件嘢，我就係出現咗喺佢哋生活入面，聽佢哋把聲，見到佢哋個樣，我就攞住呢種同在嘅核心同佢哋相處。」