意甲上周煞科，因疫情而延遲完結嘅四大聯賽曲終人散，周二仲流出意甲MVP人選，祖雲達斯球星基斯坦奴朗拿度（C朗）竟然輸畀隊友保羅戴巴拿，難怪C朗呢排雖然趁有一個禮拜休息放鬆吓，早前已有好多佢同家人出海嘅相流出，坐住自己架豪華遊艇喺海上超級梳乎，呢兩日又俾記者拍到佢架遊艇去到熱拿亞一個叫菲諾港嘅小漁村後，同女友佐真娜撇低一班仔女上岸，約咗一班朋友喺嗰度晚餐，但全程由海港行到去餐廳都冇戴口罩嘅C朗，嬲爆爆咁樣啦！
女友低胸開衩派福利
外國人幾勇大家都知，好多人疫情未爆完都堅持唔戴罩，C朗睇嚟都係一樣。雖然呢度係小漁村，但C朗行緊嗰一帶都算係幾熱鬧，相入面見到條街好多人，但佢同佐真娜及成班朋友都冇戴口罩。C朗當日裝束唔算好特別，但C朗嫂就唔同喇，着上一條閃藍低胸開衩連身裙，好似去ball 咁款，睇嚟諗住去見C朗啲朋友，梗係唔可以失禮。
武肺殺到阻佢去巴黎
祖雲達斯周五就會喺歐聯同法甲球隊里昂踢埋場次回合，首回合落後緊0:1，所以呢場波一定要贏兩球或以上先有機會出線，但家陣C朗唔戴罩去玩，一個唔小心染病就冇得踢。講開里昂，唔可以唔提近日原來又有法國傳媒爆番C朗喺歐洲未爆武肺前，曾經計劃好今個夏天就轉戰法甲踢巴黎聖日耳門（PSG），話說佢早喺上年10月，就已經因為唔太滿意祖記冇稱霸歐聯嘅實力同雄心，想轉去同尼馬、基利安麥巴同卡雲尼比合作，咁樣先可以增加自己第六次稱霸歐聯嘅本錢。點知就係因為武肺殺到，搞到佢想過檔PSG嘅夢想唔大機會成真。
如果失落意甲MVP嘅C朗真係去PSG，有冇歐聯就唔知，但呢隊波喺法甲超班，到時歐洲5大聯賽拎到其中4個聯賽嘅冠軍，都咪話唔威水。至於今次武肺搞到金球獎都要停辦，主辦方《法國足球雜誌》就諗到另外一樣嘢嚟取代，就係改選史上最佳夢幻隊11人陣，每個位置最高票數嘅就會當選，但C朗想拎到呢個至高無上嘅榮譽，就要同比利、告魯夫、朗拿度以及天敵美斯等從古至今嘅最強球星一齊較量。