去年五月因突發心臟病要暫停球員生涯嘅西班牙傳奇門將卡斯拿斯，禮拜二喺社交網站正式宣佈以39歲之齡退役，仲留低一段感人之言，為自己嘅職業生涯作結。
呢位前西班牙國家隊及皇家馬德里門將，舊年五月喺波圖操練嗰時突然心臟不適要送院搶救，雖然保得住條命，但都因為心臟病緣故，一直未能復出重踏綠茵場。今年二月佢宣佈會參選西班牙足總會長，波圖主席賓度迪哥斯達曾爆料話佢將會退役，只係呢個消息一直延遲到禮拜二，卡斯拿斯先喺社交媒體正式告別：「重要嘅係你走過嘅路，同埋一直陪伴你同行嘅人，而唔係終點。一路以來嘅努力，帶我嚟到這個位置，我想講呢這條已經係我想行嘅路，到達咗夢想中嘅目的地。」
雖然聖卡斯無法再喺球場上接受球迷嘅掌聲告別，但長達超過20年嘅職業生涯以來，佢為皇馬贏過19座冠軍，包括5次西甲同3次歐聯，更代表西班牙國家隊贏過1次世盃及2次歐國盃，球員生涯可謂無憾告別喇！