中共國家主席習近平唔止喺中共政權上稱帝，連香港民研公佈最新十大兩岸政治人物嘅調查報告亦顯示，佢喺中國政治人物入面亦成功攞第一，不過係倒數第一。 香港民研喺本月20至24日就兩岸領導人評分，訪問咗1,024名港人，結果發現習總只得40.7分，而多次發表公開演說支持港人嘅台灣總統蔡英文就有57.6分，大幅拋離習總16.9分，連已退下火線多年嘅中共前總理朱鎔基都有61.6分，高過習總20.9分。
根據香港民研調查結果，習總喺十大兩岸政治人物調查入面，最為人熟悉，認知率高達94.3%，之但係認知率同評分又無關嘅，緊隨其後嘅蔡英文認知率達90.2%，但蔡嘅評分就高過習總多多聲啦。
鍾劍華：港人懷念逝去歲月
究竟點解自詡為21世紀毛澤東嘅習總，會輸咗畀蔡英文同朱鎔基呢？研究所副行政總裁鍾劍華就指，結果反映港人不滿習近平對港嘅管治手法，而習得分遠低於已不在任嘅朱鎔基，不排除港人掛念朱曾經喺2002年訪港時提到「如果香港搞壞了，中共就是民族罪人」嘅管治模式，更顯示出「香港人都好懷念逝去咗嘅歲月」。