「馬騮仔」後生好花弗，身邊女友轉唔停，雖然佢同正印拍拖好多年，但依然背住正印經常偷食，真係人不風流枉少年。不過步入中年後，馬騮仔見身邊好友都有幸福家庭，有仔有女，加上家中長輩年紀有返咁上下，所以佢亦萌起成家立室嘅念頭，左揀右揀下，幾年前佢終於娶咗內地女晴晴做老婆，大家都大跌眼鏡，馬騮仔媾女無數，點解會俾晴晴綁住，原來晴晴有一招撒手鐧，足以令馬騮仔貼貼服服。
黐闊太被寸
馬騮仔份人一向對身邊嘅女人好孤寒，每次女友見到靚鞋、靚袋嗌佢送，佢都會話：「乜你唔係鍾意我個人，係鍾意我啲錢咩？」令對方即刻打退堂鼓。晴晴當年就係收到風，所以識得以退為進，從來唔會開口要求買嘢，只會扮慘，每次見面就着舊衫，等馬騮仔自動買衫畀佢。馬騮仔覺得佢好純又冇要求，有時約晴晴食飯，都會被拒，話要做兼職唔得閒，咁馬騮仔就自然心痛女友，咁辛苦都係搵得雞碎咁多，咪索性畀家用叫佢唔好做，晴晴最終就順利入宮坐正。
晴晴入門後識到唔少闊太，不過入得富貴圈子，馬騮仔都要啲面子，聽到老婆呻話其他闊太寸佢靚錶都冇隻，首飾又冇，馬騮仔於是自動買嘢畀老婆，所以話晴晴扮純呢招真係好聰明。
撰文：Jessie
本欄逢周三刊出
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。
