最近全港多個區湧現一批撐特首林鄭月娥嘅海報，仲要全部一式一樣，都係林鄭同母校嘉諾撒聖方濟各書院一班小師妹嘅合照，一睇已經知又係藍絲搞出嚟，想幫777洗底宣傳，但搞還搞，搞到無辜嘅林鄭母校、仲有佢班小師妹同家長，更加可能犯法，就知藍絲係幾唔用腦。
驚見肉麻字句「在乎妳」
呢批海報遍及銅鑼灣、沙田、荃灣、鑽石山等地，海報係777同一大班師妹嘅大合照，相中777笑笑口企中間，身邊企滿身穿校服嘅女生，人人笑容可掬、天真爛漫，同時海報更寫有「明白妳」、「在乎妳」等肉麻字句。翻查資料，大合照係2017年777作為候任特首，返母校探訪時拍嘅，呢幅合照更見藍絲fb專頁廣傳。
不過最大問題係，海報入面班女學生完全冇「打格」遮樣，等同將私隱公開。據知有女生家長睇到海報，發現相中人包括自己個女，覺得個女私隱被侵犯，即時舉報，有家長更加向警方報案，但popo派員到場，發現海報係撐777，就立即收隊走。
嘉諾撒聖方濟各書院就話，一直唔知呢件事，對於有個別人士或團體，未經校方同意使用佢哋學校網頁或刊物上公開照片深感遺憾，現正同相關政府部門了解，同要求移除啲海報。
李八方