日劇《半澤直樹2》回歸，上月19日在日本首播已引起話題，前晚第三集更成為本年度劇集的收視冠軍。而「港版半澤直樹」陸駿光也有好消息，武肺疫情下不但有工開，更憑去年拍港台劇《星星的孩子︰魚蛋》勇奪2020年紐約電視電影節男主角銅獎，演技獲國際認同。陸駿光在娛樂圈打滾多年，捱過不少艱難的日子，當年為當演員，甚至犧牲一段三年情，幸好最終遇到太太陳曉欣，讓他無後顧之憂繼續追夢。
現年42歲的陸駿光，入行逾20年終於取得人生第一個獎項，不過他日前接受《蘋果》專訪時，直言拍得獎電視劇《魚蛋》時，非常心痛，因為他在劇中飾演一名剛經歷喪妻之痛、要獨力照顧15歲自閉兒子的中年男士阿滔，兩父子交流出現障礙，令陸駿光心力交瘁，他說︰「呢個國際獎項係我人生第一個獎，多謝導演黎敏儀幫我報名。喺《魚蛋》裏面，我演嘅角色阿滔要面對太太離世，照顧有自閉症嘅囝囝，好多嘢屈住，有一幕爆出嚟，差啲打個仔，係無奈亦係愛。拍之前我連鬚都白埋，情緒好差。」
做演員沒有保障
談到去年逆權運動加上近半年的武肺疫情，陸駿光自言情緒起伏大︰「抽離唔到，尤其內心深處嘅痛，我有段時間直頭唔開心到周身出疹，疫情令我覺得生命好脆弱。除咗借角色去抒發同屋企做運動發洩，好彩老婆嘅陽光感染我，時勢艱難，我哋大家互相扶持多咗。」近日香港爆疫情第三波，陸駿光感受至深︰「我真係驚，啱啱拍完劇集《太平紋身店》，有場戲同駱振偉兩個人共享一支煙，我知佢身邊有朋友高危，所以都有打畀佢問清楚拍之前佢哋有冇見，佢話冇我至放心。」他說做演員沒保障，只能靠自己︰「你一除個口罩化妝就冇得驚，更何況拍攝時同其他人互動。」
發脾氣離家出走
陸駿光入行多年，多得太太背後支持，他說當年為了演戲，甚至連愛情都要犧牲︰「其實同太太拍拖前，幾段情都好傷，其中一段長達三年嘅異地戀，同女朋友斷斷續續只相處得半年，佢想我留喺加拿大陪佢，我當年喺無綫，雖然個心係想一齊，但最終嗰陣未想成家立室，都係揀咗事業。差唔多30歲至識我太太，可能是timing夾，我哋好快一齊，佢從來冇要求物質享受，只要有屋住，每年去一次日本旅行，就係咁簡單，佢畀到我最單純嘅愛情。曾經有半年好運滯冇工開，試過發佢脾氣仲離家出走，後來佢拖埋隻狗落街搵我，自此我收斂自己脾氣，好後悔，咁樣一走了之好唔負責任。」
除了太太，陸駿光說父親曾教他做人要忠於自己。陸父是傳統中醫，一生人都在醫館裏工作，他鼓勵兒子外出闖世界。陸爸爸在他十多歲時過身，但有段舊事令他畢生難忘︰「嗰陣我阿嫲住喺醫館樓上，而我住嘅單位係望到醫館，記得有一日，阿嫲樓上個單位火燭，我見到老竇未等消防員嚟，即刻除咗件面衫衝入火場，抱咗阿嫲落嚟，呢件事令我覺得呢個係真男人嘅定義。佢冒住生命危險救自己媽媽，呢份勇氣係發自內心，將來屋企有事，我都會第一個企出嚟。」
撰文︰祖李
攝影︰林德雄
化妝及髮型：Kyo Lee
服裝提供：O.N.S. at Kapok