令自己成為「真係笑話」嘅撐警藍絲導演李力持，5月時喺facebook專頁上載咗香港記者協會嘅記者證樣本圖片，然後留言「邊位想做記者可以自己DIY」，實行公然違法，涉嫌教唆他人偽造虛假文書，雖然佢事後即時刪帖，但若要人不知已經太遲。
籲港禁用「Twister」
記協當日發聲明嚴厲譴責，主席楊健興仲親自去咗轉灣仔警察總部報警，但事發未夠三個月，八方就非常驚訝，因為成日虛構指控話有假記者嘅PoPo，竟然對於有人教唆他人做假記者嘅惡行視若無睹，寫信畀記協話認為證據不足，所以唔會採取檢控行動。究竟係證據問題定政治問題，大家心中相信都有答案啦！記協就話正研究跟進行動，並會向警方查詢調查詳情，包括究竟點樣證據不足，同埋事件係咪已經當結案處理。
李力持聽到呢個消息唔知心中有冇興奮啦，但睇返佢呢排嘅網上留言，就似乎竭力維持水平，最新示範係高調呼籲香港應該禁咗「Twister」，因為危害國家安全。八方估計因為佢唔多用同唔多睇，所以先將Twitter串錯，但其實如果真係禁twister，即係「禁止扭曲事實嘅人」？唔知李力持有冇諗過推自己上名單呢？
李八方
