曼聯名將朗尼只係捧起過一次歐聯冠軍，2009同11年2次殺入歐聯決賽都輸畀巴塞隆拿。朗尼近日接受《泰晤士報》訪問時就話，當時嘅領隊費格遜爵士，喺兩次嘅歐聯決賽都用錯戰術，令球隊輸波。09年衞冕嘅曼聯喺決賽到對住巴塞，輸咗2:0；兩年後，雙方再次喺決賽相遇，雖然朗尼入波，但球隊仍然輸1:3。朗尼認為，當時曼聯應該要放低身段去比賽：「我哋遇到哥迪奧拿帶領嘅巴塞時，輸咗兩次嘅歐聯決賽，當時我哋用咗高位逼搶，但咁同自殺冇分別。」朗尼仲將兩度決賽失利歸咎落費Sir到：「我記得當時費Sir話『我哋係曼聯，我哋要去進攻。』，當時我已經產生過質疑，我覺得其他人都知咁係唔啱嘅，事實上我哋兩次都畀巴塞搞掂咗。所以對我嚟講，踢成點都冇關係，只要贏到波就得。」