特區政府高調闢謠，表示市民做了病毒檢測後，基因資料絕不送中云云。有個智商未破底的藍絲友人問我：「吓？政府唔講我都唔知有咁嘅謠言！乜原來DNA會送中㗎？」我說：「你係唔識中文定弱智，政府話DNA資料唔會送中呀！」
友人說：「我中文真係麻麻，淨係聽過鬼佬講『Never believe anything until it is officially denied』，咁你話信唔信政府好？」我答：「梗係信。𠵱家我每朝起身都向基本法裝三炷香，而根據基本法神聖嘅第一條：『香港特別行政區是中華人民共和國不可分離的部分』，再加上有偉大嘅國安法庇佑，就知道香港又好大陸又好，咪一樣係中國，不用分那麼細。既然所有嘢都可以喺香港做，點解要送中呢？人驚你又驚，你知送中做乜咩？」
友人說：「Er⋯⋯係喎，送中做乜？」我說：「有謠言話，係好似新疆咁做『DNA表型分析』吖嘛。」「咩嚟㗎？」「即係用一個人嘅基因資料重構佢嘅面譜，方便識別罪犯，加強社會監控。」友人馬上說：「吓？咁香港唔可以做分析咩？政府否認送中咋喎，冇否認會做分析。」我豎起大拇指稱讚：「你都蠢唔晒。冇錯，政府咁講，原理就好似梁振英話老婆放棄英國護照，但冇話放棄英國國籍一樣——唔放棄國籍，隨時可以續領護照㗎嘛。」
友人說：「X，咁我唔做啦！」我搖頭嘆息：「唉，一日最衰都係政府，淨係識同市民講唔會送中，搞到國家好似怪獸咁。其實送中又有咩問題呢？都係美帝媒體比較持平。」「咩話？」「舊年年底《紐約時報》有篇報道，記者去咗新疆圖木舒克市，有維吾爾人權組織同佢哋講，政府用全民體檢做藉口，收集DNA樣本。不過呢篇文最後係引述圖木舒克衛生局嘅說法，話呢啲全部係謠言，市民係自願接受體檢，至於收集DNA樣本，佢哋話聽都未聽過呀，仲話記者將體檢同收集DNA混為一談，非常無恥。你睇新疆當局否認得幾霸氣，林鄭學吓啦。」