辛度華拿上年由拜仁轉投中超嘅天津泰達，袋緊1,500萬歐元年薪。不過佢上月24號就話因為家庭原因唔會返中國，正式同天津泰達解約，禮拜日仲正式宣佈退役，結束佢14年嘅職業生涯。佢話：「多謝足球，能夠實現自己嘅夢想，仲可以着起德國國家隊戰衣，令我特別自豪。」佢又話：「九月份我會開始我嘅教練課程，希望下年夏天開始教波，𠵱家就放番一年假，享受同屋企人一齊嘅時光先。」事實上，佢宣佈解約後講過，自己唔想喺武漢肺炎疫情下離開佢四個子女。32歲嘅辛度華拿曾經為拜仁贏得07/08同埋17/18年德甲冠軍，亦曾經為德國國家隊上陣8次攻入5球，係德國贏得17年洲際國家盃嘅功臣之一。