波蘭前鋒羅拔利雲度夫斯基效力多蒙特時曾經喺歐聯四強，對皇家馬德里上演過「大四喜」，相信令「銀河艦隊」對羅拔仔念念不忘。有波蘭傳媒流出一份2013年12月，皇馬向羅拔仔開出嘅厚約，當中列明會向羅拔仔提供20萬歐元（約170萬港元）周薪，以七年前嘅環境嚟講係非常之優厚，如果羅拔仔願意喺呢份長達六年嘅合約上簽約，仲可以獲得一筆超過1,000萬歐元嘅簽字費。不過合約中亦詳細列明咗一啲條件，話禁止羅拔仔參與危險活動，據報羅拔仔亦擔心自己，搶唔到賓施馬嘅正選要坐後備，結果羅拔仔當年請皇馬食檸檬，14年夏天就自由身加盟咗拜仁慕尼黑，仲為拜仁連贏六個德甲冠軍呢！