恐懼令人不敢發聲，帶來寒蟬效應，導致公共事務再乏人關心，但職工盟主席吳敏兒明言，國安法雖禁止勾結外國勢力，工會更要堅持講真話，繼續連結國際擴大工會戰線，團結打工仔「聰明抗爭」。
吳敏兒︰續連結國際 擴工會戰線
港版國安法公佈前後，吳敏兒形容大家不知所措，惟經過「冷靜期」，大家不約而同認為不必過度恐慌，「我哋工會一路有同外國工會『民間外交』，互相聯絡更新現況。呢啲工作同勾結外國勢力、顛覆國家政權係唔可以相提並論。」
她解釋，外國工會可協助對跨國企業僱主施壓，「呢個係僱主嘅層面，按我同常人理解，唔覺得呢啲連結係國安法打擊對象，同國際工會嘅接觸一路都係講緊勞動權利等於人權一部份。」
惟誰敢保證政權不會把打擊面擴展至工會？吳敏兒坦言，有心理準備最壞情況下要坐監及被送中，「政權打壓無所不用其極，呢刻唔覺得你勾結外國勢力，唔等於下一分鐘唔會改變主意。」惟更深信與其談未知的恐懼，更應為打工仔切身問題擔憂，包括專業倫理在當下已受威脅，國安法陰霾下，不少條文可影響專業人士的專業決定，「好似會計師，當佢發現客戶盤數有問題，披露咗會唔會惹禍上身？秉唔秉持佢嘅專業界線呢？唔同工會擔心咗幾日，但慢慢去番原來諗法：條法例越係想我哋唔好講真話，我哋就越要將真相講出嚟。」
她指，香港新一波工運只發展了一年，已較從前有極大成長，「唔可以停，要不斷抗爭壯大工人同工會力量」，特別在街頭戰線減退下，將需要「聰明抗爭」，包括以經濟杯葛等新方式延續，而工會就可參與其中。