巴西著名球星「大哨」朗拿度，曾經同「細哨」朗拿甸奴同李華度，組成令人聞風喪膽嘅「3R」組合，幫巴西贏得2002年日韓世界盃冠軍，相信唔少球迷仍對佢哋嘅球技津津樂道。事隔18年，「大細哨」都退咗休喇，不過佢哋現時嘅遭遇就真係大不同喇。
監獄球王快甩難
事關細哨朗拿甸奴早前涉嫌用假護照入境巴拉圭，一度要踎監𠵱家仲要畀人軟禁，最近雖然認罪，但有傳最快今個月先可以甩難；不過嗰邊廂發晒福嘅大哨朗拿度，就正喺地中海同女朋友享受陽光嘆世界，睇嚟大哨過得比起有招牌笑容嘅細哨快活好多喎！
已經43歲嘅「外星人」朗拿度，自從九年前宣佈退役後，身體不斷發福膨脹，近日仲被影到同女友依蓮娜，一齊喺直屬西班牙、位於地中海巴利阿里群島中嘅一個小島，喺遊艇上享受日光浴。只見肥仔朗拿度同女友有傾有笑，「仲有最靚嘅豬腩肉」附體嘅大哨，跳入水嗰時仲好似深水炸彈咁水花四賤。
朗拿度嘅27歲女朋友、嗰日着起灰色比基尼嘅依蓮娜係身高達1米8嘅巴西著名模特兒，弗爆嘅線條同朗拿度形成強烈嘅對比，難怪昔日女伴無數嘅朗拿度，都忍唔住要喺遊艇上擁抱親吻對方。不過朗拿度之所以咁鬼肥，據報係同佢自身嘅甲狀腺機能疾病有關，令到佢甲狀腺分泌失調令身體不斷暴漲，所以大哨玩還玩，一定要小心身體喇，事關12年曾經因為患上登革熱入院嘅朗拿度，兩年前嘅夏天仲喺西班牙伊比薩島度假期間患過肺炎。好在當時有女友依蓮娜陪伴在側，悉心照料之下好番，家陣睇嚟精神都唔錯喎！
離四次婚終於定性
事實上，朗拿度已經同依蓮娜一齊咗五年咁耐，二人嘅感情似乎越嚟越穩定。以前風流成性嘅朗拿度，曾結過四次婚但全部離婚收場，仲同3個唔同嘅女人生咗4個仔女，當中包括有妓女踢爆朗拿度喺日韓世界盃期間，搞大咗佢個肚要驗DNA，證實係朗拿度第四個子女，結果大哨之後決定做輸精管結紮手術，認為生咗四件就夠晒數！自從識咗依蓮娜之後，都冇乜再聽到佢風流嘅新聞，呢位昔日巴西球王，終於識得定性喇！