港版國安法生效，香港人如果威脅到脆弱嘅國家安全固然係嚴重罪行，就算只想做個平民都要愛國愛港，從政者都要信奉《基本法》，搞到黃之鋒忍唔住錯誤咁話國家領導人、鍵戰閒人前特首梁振英同屋企人有英國護照，換嚟國家領導人高調反駁。
689愛黨愛國之心可昭日月，前公務員事務局局長王永平噚日仲專登撰文，重提一件舊事。平叔話689兩年前公開講自己同三個仔女都冇外國護照，甚至唔應該有英文名，佢當時讚揚689嘅愛國情操，仲建議佢主持誓師大會，畀機會一班愛國港人宣佈全家放棄外國護照同居留權，但結果當然冇件事。
點解平叔舊事重提？原來佢話人大常委譚耀宗放風，話中央可能唔承認BNO港人係中國公民，擁英國護照嘅愛國人士及其家人理應有同樣待遇，「否則政府以至建制陣營必然爆發極大內部矛盾」，如果官員宣稱愛國但家人心繫外國，恐怕難取信於民，所以平叔要求愛國人士向689學習，全家放棄外國護照，八方都舉腳贊成呀！