虛銀推出進度比預期緩慢，杜夫人發夢都諗緊有乜嘢值得寫。多得讀者報料，發現平安壹賬通銀行開戶時，國籍一欄，竟然離奇地無提供「台灣」呢個選項，而其他虛銀都有得揀。
讀者A最近獲邀請率先開戶，驗證身份證及自拍後，就要填基本個人資料，講到填「國籍」呢一欄，如果銀行無pre-fill到「中國香港」，正常人都會理所當然自己填返，都真係完全無懸念嘅。
不過，呢位讀者認真手多，竟然想試吓揀「台灣」，但無論係「台灣」抑或「中國台灣」一樣無得佢揀。平安壹賬通銀行嗰欄國籍寫明「國家/地區」，「香港」、「澳門」、「中國」都齊晒，惟獨唔見「台灣」！
金管局話虛銀以服務香港人為先，但係國籍選項要齊全至少有兩個原因，一是香港暫時仲係允許多重國籍嘅地區，二來銀行又豈會局限潛在客戶群，而且外籍客戶需要處理的銀行服務更多更闊，潛在龐大人口紅利不容忽視。 至於點解會見唔到「台灣」？真係要問平安壹賬通銀行先知。不過，「一時大意」問題唔大，最緊要政治正確啫，好似其他虛擬銀行咁，寫清楚咪好囉。
又update一下虛銀進度。本港疫情反彈打亂虛銀部署，或多或少會影響監管審批流程，繼眾安銀行及天星銀行之後，匯立銀行周四亦已登場，初期個app有少少lag，從traffic嚟睇，反應唔錯咁喎，首日無一萬都有幾千登記啩。
至於平安壹賬通銀行、Mox Bank、螞蟻銀行就仲試緊業，僅限獲邀用戶申請，目的都係確保系統運作暢順。據聞螞蟻銀行闖關失敗，UX／UI （User Experience/User Interface）未盡完善，力求100%到位的監管唔肯放人，下次再講。
唔係8張虛銀牌照咩？乜數來數去都係得6間？無錯呀！Livi Bank、富融銀行都真係未有聲氣，如有內情，歡迎PM。
杜夫人
http://fb.com/mrsmarydoo