早前已經提早喺意甲封王嘅祖雲達斯，上禮拜六喺最後一輪賽事主場迎戰羅馬，教練沙利就連葡萄牙球星基斯坦奴朗拿度（C朗），都冇列入比賽大軍名單。雖然祖記有前鋒希古恩開賽初段就幫球隊先開紀錄，但最後都俾羅馬反勝3:1，保持咗超過兩季嘅主場不敗身終於都保唔住！
對上主場輸波係沙利傑作
意甲煞科分上周六同噚日兩日進行，前列分子喺上周六嘅五場比賽踢先。由於到今個周五就要轉戰歐聯16強次回合賽事再鬥里昂，所以喺意甲提早兩輪奪冠嘅祖記，決定畀C朗等一班主力休息機會，C朗亦都注定無緣意甲神射手同歐洲金靴獎兩個獎項。雖然開賽五分鐘，希古恩喺門前射入，幫祖記領先1:0。但係羅馬之後極力反撲，最終靠住柏洛迪梅開二度，加上卡連歷嘅入波，喺作客嘅情況下3:1反勝祖記，打破對手主場不敗身。
至於提早封王之後就連輸兩場嘅祖記，今場仲要俾羅馬打破埋主場嘅不敗金身，係球隊自2018年4月0:1不敵拿玻里後，聯賽再次喺主場輸波。值得一提嘅係，當年帶領拿玻里擊敗祖記嘅教練，正正係家陣教緊祖記嘅沙利。至於最後祖記喺38輪聯賽入面拎到83分，只係比起第2名嘅國際米蘭多1分。
干地贏波鬧爆國際唔夠支持
同日國際雖然靠艾舒利楊格貢獻一射一傳，作客2:0擊敗阿特蘭大，保住第二位完成球季，亦令黑馬阿特蘭大唔能夠達成單季聯賽入100球嘅里程碑，後者自上年11月以嚟首次喺聯賽冇波入。國際教練干地對於亞軍成績似乎唔多滿意，賽後鬧爆球會：「我哋同祖記仲有好大差距，個人層面嚟睇，今季非常困難。我唔認為球員同我哋教練團嘅工作得到應得嘅認同，球會要畀我哋更大嘅支持。」