英國應對港區國安法，提出香港BNO持有人可以移居英國，住滿五年可以申請入籍為英國公民，一共大約需要六年時間，條件可說甚為寬鬆，估計有近三百萬香港人有資格申請。
移民嘅嘢，純粹自發，冇人用支槍指住你，逼你移民英國，移唔移係閣下決定，大家都知道人離鄉賤，外國有種族歧視，語言不通，外國主流社會難以融入呢回事，但1983之後，1989之後，還是有大量香港中產移民去加拿大、澳洲、紐西蘭、英國、美國，吃過不少苦頭，家庭破裂，為咗乜？大家心知肚明，不再多講。可嘆者，就係現時有不少加拿大籍香港人，統稱加拿大藍絲，在溫哥華發功聯署支持港區國安法，反對香港人移民，本港之加拿大藍絲又在群組嘲罵BNO移民，呢類加拿大人有冇諗過，30幾年前你地為乜嘢走咗去加拿大捱苦呢？如今苦盡甘來，印印腳嘆世界，竟然指罵BNO移民，為何心腸咁壞？
本港議員之中，葉劉淑儀鬧BNO移民鬧得最犀利，又係不知出於甚麼心態，港島最多中產富戶，其中當有不少係合乎BNO資格，可以移居英國嘅，呢班港島選民會點樣投票？雷鼎鳴教授既然希望香港騰籠換鳥，三十萬人走資頭就啱數，咁樣BNO移民應該合乎西環心意嘅啫，唔通雷教授估錯晒領導人心意？
還有一啲中產評論員早時猛咁推介投資移民，出外買樓，突然間潑冷水，話倫敦樓價貴，租金貴，移民英國要諗清楚。倫敦中心區樓價梗係貴啦，例如有人移民嚟香港，係要住在中環灣仔嘅話，邊會搵到平價樓，但英國咁大，唔住倫敦得唔得呀？離開倫敦一小時（搭火車），樓價已經便宜好多，金融時報訪問香港人移民英國，指倫敦平均樓價62.4萬美元，香港平均樓價係125萬美元，理論上賣咗一層香港樓，可以買入一層倫敦樓，仲剩番60萬美元，英國打工仔之年薪中位數約係40萬港元，60萬美元足夠在倫敦住六年，一直住到取得英國護照。左丁山並非鼓勵BNO資格人士移居英國，而係驚奇於點解咁多藍絲及建制派政客痛恨英國推出BNO移民計劃，而對東南亞國家來港大舉推銷「買樓安居」則完全當冇到？林鄭家人有英國護照，譚耀宗楊潤雄兒子移居澳洲，曾鈺成也曾移民加拿大，依家藍絲評論員做乜鬼大罵BNO移民呀！