因為麥德羅，好多個藝人名字都連帶出現了，飯局群組又慶生群組，確診了或隔離中的名字，有的陌生有的似曾相識。高鈞賢，回來了。
一提高鈞賢，港男封號入腦，第一屆香港先生冠軍。離開香港到內地發展6年，現在愛回家，身為飯局人物鏈之一，他檢測報平安後，別來無恙來到飯局地點。
高鈞賢說，得知麥德羅確診後，為了家人和朋友安心，他立即到醫院檢測，陰性結果意料之內，他說自己沒有擔心過。反之6年前離開香港，卻是真正的「今日唔知聽日事」。
20歲出道，成名要趁早，高鈞賢今年才36歲，正值男人黃金衝刺期，同屆港男有不少已經轉行，「有啲轉咗行，已經做咗保險，香港先生都冇咗啦（停辦），所以我作為第一屆，我希望可以盡一分力去堅持，唔好放棄囉！」
有一個「朵」可以令人記起，也是一種成就。
撰文：文嘉龍
攝影：郭賢興
香港觀眾好似冇忘記我
訪問現場，食店老闆不忘澄清，麥德羅當日在獨立房的飯局，與包了大廳另一娛圈中人慶生的飯局，是兩個不同群組，而當晚在場的食客事後檢測亦沒有「中招」，麥德羅是在之後另一個慶生唱歌群組出事的。
上月初包了大廳慶生的圈中人，原來是黎明唱片公司的前高層王凱文（Alvin）。當晚吳卓羲、蔡一傑和鄧建明等人在席，與食店老闆稔熟也是Alvin好友的高鈞賢，也是賓客，「我印象中其實冇麥德羅在場，咁多人我自己都唔為意，我臨走同佢同一架𨋢一齊走，我就戴咗mask。今日find out咗原來佢係去另外一邊嘅獨立房！」
高鈞賢說，完全不認識麥德羅，「我淨係有印象佢嗰晚着咗件背心，都幾大隻喎呢個人！」麥德羅確診，牽連甚廣，高鈞賢立即到醫院檢測，「其實最擔心唔係自己，係因為同屋企人住，我家姐又住得好近，我哋成日都會過去食飯，我家姐有兩個女，呢個係最擔心。」
一場武肺，令原本在內地已發展6年的高鈞賢，因為疫情回家了，「我想畀自己休息吓，又順便可以探吓我隻狗，我隻狗14歲好老喇，我都想spend多啲時間陪屋企人。」5月12號返港的高鈞賢，這兩個多月來，令他有不一樣的感覺，「覺得香港觀眾好似冇忘記我喎！因為疫情關係，我8月本身都有兩套網絡電影都推咗，𠵱家唔止14日（隔離），我返去要21日，如果我再返嚟就14日，變咗一個多月，我自己諗法又有啲唔同囉！」
這段期間，離開無綫6年的高鈞賢，再次踏足娘家錄影《流行經典50年》，他在節目中唱了張國榮的《共同渡過》，「我覺得幾開心。我自己有一個感覺，香港仲有一個觀眾係支持我嘅時候，我都要做好呢份工作，同埋可能𠵱家世界發生好多事，又有疫情又有好多天災，我覺得屋企人都係好重要。」
每個月都有二萬五人工
重點是，他簽約內地的經理人公司也剛好滿約，自由身的高鈞賢說，當務之急是要開一個YouTube頻道，趕上自媒體行列，「At least去try咗先，好似我以前喺TVB，我20歲就入行，然後我10年時間就由一張白紙喺TVB做做做，30歲嘅時候，我自己都想有一個變化，我覺得我唔止可以喺TVB呢一個平台，我咪試吓跳出去喺內地做囉，𠵱家我喺內地攞咗一啲經驗，我又再有好多唔同嘅諗法。」
返大台拍劇，高鈞賢說不會抗拒：「我覺得𠵱家呢個時代係win win（雙贏），當然你做演員梗係想做一個男一號角色啦，唔止TVB，如果畀到我想要嘅嘢，而大家可以win win咪去做囉！但係我唔會話我返嚟香港，我就一定要入TVB拍劇，可以有其他方法去做演員呢個職業。」
高鈞賢2005年參選第一屆香港先生得冠軍，做了無綫「親生仔」9年才離開，在無綫最後幾年越做越霉，角色可有可無，令高鈞賢決心要走。「我覺得每一件事都有好與壞，其實我已經好好，就算佢轉合約，我每個月都有二萬五蚊人工。當時年輕有年輕嘅諗法，覺得好唔fair，畀好多客串角色我，其實有好有唔好，唔好嘅，當然唔鍾意一個角色做一個禮拜就finished；好嘅係當中學到一啲經驗！其實係有啲反叛，我之後做好多活動，TVB都冇做媒體訪問，今次反而我做完《流行經典50年》，佢哋又做返我（訪問），我覺得都係一個幾完美嘅結局囉！」
當年不肯續約走人後，高鈞賢原來是靠朱璇搭路才有機會到內地發展。這位前華姐冠軍朱璇，前年嫁給內地富二代老公，婚後淡出娛圈已移居美國洛杉磯。「當中10個有8個都係齋講，因為我哋做呢行，你唔係真係做，你都唔知（真定假）。最尾有一個經理人就係朱璇介紹畀我識，因為朱璇同北京嘅一個朋友好熟，嗰個北京嘅朋友就係呢個經理人嘅artist。佢都有幫我line up好多湖南衛視綜藝騷（第一屆《舞動奇蹟》），但係當時我仲係TVB人，甚至我最後排咗隻舞，最尾都轉咗人去做（換上苗僑偉），有好多呢啲去內地嘅機會都損失咗！佢同我講返呢啲case，佢話覺得我喺內地有market，我當初都唔係好信，不過上到去，佢就帶我去咗北京演藝學院，見咗香港導演朱銳斌，拍咗呢套叫《山海經之赤影傳說》，有關智斌、張翰。我覺得我30歲之前嗰幾年，係少咗進步，我覺得你做artist，如果唔係每年都有進步，我覺得不如轉行，做第二份工可能仲開心。」
為轉行做準備的高鈞賢，其實搞過不少生意，統統蝕本收場，「我30歲之前已經鋪緊路做生意，開居酒屋、學校（藝術學校），又搞過時裝，蝕錢收場！我覺得都係我人生一部份，蝕得最甘係藝術學校，因為居酒屋有partner，藝術學校頭一年都好好，第二年因為啲老師轉咗行，對生意額都有影響，但係我自己就唔會放棄，例如我自己鍾意飲紅酒，我咪去做紅酒生意囉，就算我賣唔到，我唔會蝕㗎，我最多咪飲咗佢囉！」
我人生不斷從頭開始
2014年到內地發展，對於7歲就移民加拿大的高鈞賢來說，一向英文好過中文的他，要說普通話，只要努力練習總可適應，「最唔適應係今日唔知聽日事囉！始終我第一份工就喺TVB，我一嚟就簽經理人合約，佢畀月薪我，一路以嚟嗰9年，我都未試過唔夠騷，我都係決定唔留低，確實我完約前嗰幾年，工作上係冇進步，我會好擔心我自己好努力，但係觀眾都唔會有機會睇到！」
頭一年在內地的生活最難捱，「第一年我都有好多面試、見好多人，但係好多都係promise咗你，但係又未必搵你去拍，係會難受啲，可能我唔同其他artist，佢哋喺TVB有好多好好嘅作品，上到去人哋就指定要搵佢，我係希望有人可以畀到機會我去做，直到我第一套劇《山海經》喺湖南衛視出咗，我又拍咗好多綜藝節目，跟住就慢慢好喇！」
7歲舉家移民加拿大的高鈞賢，細細個在加國睇無綫劇長大，最愛看《創世紀》，那時候已經立志入娛樂圈，「睇《創世紀》好鍾意羅嘉良、古天樂，我覺得如果有得拍戲好似佢哋咁就好啦！嗰邊有唱歌比賽我又參加過，又有第一屆嘅《Sunshine Boyz》，我贏過冠軍，其實即係好似香港先生，一個加拿大中文電台搞嘅一個騷。做完我又覺得，咦，好似有啲fans喎，好似幾過癮，由一個加拿大好細嘅market去到香港，去到TVB又想跳去一個再大啲嘅market去內地，我嘅人生就係不斷咁樣從頭開始，從頭開始去拼搏！」
比較幸運的是，高鈞賢出身小康之家，專心拼搏自己事業就可以，不用為養家煩惱，「我屋企唔係一個好有錢嘅屋企，一個小康之家，爹哋媽咪唔係話等住要我攞錢返屋企養。由我十幾歲有呢個夢想入行，佢哋喺加拿大都特登搬返嚟香港，成家人support我，見到佢哋生活上要慳住，所以我嗰時係有少少抑鬱。我好記得我斷咗跟腱嘅時候，做完手術我爹哋就問我，『你夠唔夠錢使？』，呢吓我唔係好頂得順，因為我都知道佢哋都係好慳住使，我就喊囉，男人之淚。」
加拿大成長，回流香港，再到內地發展，今天再回歸，高鈞賢最愛還是香港，「因為始終我喺呢度出世，雖然我7歲移民咗去加拿大，香港呢個城市好多嘢玩、好多嘢食，同埋好diverse（多元），所以我都鍾意喺香港。每個地方都有好處甚至壞處，但係你要我揀，我梗係鍾意自己出世嘅地方啦！」
大家都係今日唔知聽日事！
【後記】世紀合照
激起高鈞賢打算發展YouTube念頭的，原來關葉翠翠事。這位緋聞女友，現在已是三子之母，更成為美容和親子界的KOL。兩人多年冇見，下午茶合照放上網，網友難得一致好評，聲稱喚起了青春的回憶。
高鈞賢說：「我都冇諗過呀，翠翠呢幾年喺香港，喺佢行業裏面做得好好，我覺得係number one！呢個feedback亦都激起咗好多觀眾，對我哋以前合作過嘅回憶。」好友已成人妻人母，已有一位圈外女友拍拖多年的高鈞賢，何時成家呢？「我𠵱家36歲，仲有5年時間都唔係太遲，41歲我覺得係時候！」
港男港姐合體，這張合照一定不會出事！
髮型：Patrick Chan
服裝提供：Vincent Li
場地提供：張公館花園