「咁細聲嘅？」阿伯歎道：「我眼又矇耳又聾，唔死都冇用──不過冇諗過咁死法，明明響老人院過日辰，有得食就食有得瞓就瞓，仔女每個月探2次，都算係咁啦……」
「你點死呢？」
「我無端白事中武肺呀！」阿伯恨恨：「幾十年冇去旅行冇食野味冇周街行冇同外邊D人吹水，甚至冇朋友，我都中招拉柴呀！」
「算啦，生死有命。」
「煮到嚟就食啦。我見好多打工仔地盤友，全日冇堂食，要踎街、跪街，日曬雨淋，或者響廁所食飯，好慘！」
司機其實亦受害者，政府知衰，煞停禁令恢復早市午市堂食。也不知香港能撐多久，要死在這毒婦手中。
他把電台聲量校大一點。
林鄭地府懺悔音頻，在狹窄的的士車間迴蕩……
阿伯道：「我就話上路唧，個柒婆生勾勾噃。」
「你有冇食過狗肉？」以前D人劏狗，斬咗幾刀，佢『勾勾』聲慘叫，原來仲未死，所以『生勾勾』即係都快㗎嘞。」他笑道：「生勾勾都會畀人勾落去嘅。」
也許是一個夢；也許半醒半睡半人半鬼，半夜良心發現，飲泣至天亮。
這是當事人大半生的懺悔錄：最初為了往上爬，扮信天主教討好上司，扮好打得圖謀上位，到了掌權，大白象工程、官商鄉黑警勾結禍港、公帑北送、送中惡法、國安惡法、防疫抗疫因不肯封關又豁免29萬人（特別是船員）檢疫致社區大爆發……連眼前這阿伯也間接被殺！
「閻大大──」林鄭哽咽（這回似是真的），「我老公都話我係『歷史罪人』，我冇做過一件對香港嘅好事，執唔番良知搵唔到自尊……我知錯嘞！」
「閻大大」？是慣性歌頌主子的口吻吧？
「十殿閻王，邊位閻大大呀？」阿伯是新鬼但非省油的燈：「你個冥通電台係咪流㗎？」
（明續）