梁芷珊集作家、企業家、填詞人於一身，2002年與羅傑承結婚，婚姻維持了15年低調離婚。芷珊指離婚報道出街後，看到別人的留言「幾廿歲人，都仲要愛情，知唔知醜」，她覺得未打先輸︰「愛情同年紀無關，講呢番說話嘅人都幾慘，不過都幾多人咁講。有呢種想法嘅人，首先係拒絕咗愛情。」52歲的芷珊依然相信愛情，2018年，梁芷珊與比她年輕11年的法籍米芝蓮三星廚師Olivier Elzer拍拖，相愛一年間，經歷過分手、復合，去年再次分手，並指二人相愛栽在相處上。
撰文：黃曉妍
攝影：沈健程
梁芷珊當年憑獨有的觸覺及懂得聆聽，寫的愛情小說大行其道，《四葉草》系列道盡年輕人的愛情故事。睽違16年再投入創作，不同的是由繁轉簡，網上發佈電子化。以往寫愛情小說時，有讀者以pm形式詢問意見，她每次都會答。最深刻是有位少女在愛情上受折磨，甚至暴力，更出人意表的是施暴者是芷珊的男性友人︰「嗰刻好震撼，我叫佢離開對方，不過少女用咗好多理由要留喺男仔身邊，我亦冇同男仔朋友講返件事。」
初戀自製偶遇
女校出身，芷珊初中就初戀，對象是男校運動健將兼田徑學界紀錄保持者。她笑稱鍾意叻的人，家住華富邨在天后上學的芷珊，每日要計準時間，乘坐駛經香港仔的41號巴士返屋企，自製偶遇︰「要啱啱好兜到佢放學嗰班車，個男仔讀香港仔工業學校，懶係製造『地下鐵碰着他』，其實係巴士上層碰着他，我哋華富邨住同一幢樓。」
經過多次陽光檸檬茶「乜咁啱嘅」的開場白，二人自然走在一起，芷珊回想這段puppy love嘴角泛起甜笑，純真年代拍拖就是逛逛超市拖手仔的甜蜜回憶。可惜中學畢業後，有一年暑假後芷珊發現高過男友，加上男友又停學就業，戀情便無疾而終。
談到與羅傑承離婚時亦不難解決，她說︰「分開時大家都好成熟，會諗一齊開心啲暢順啲定負擔多，大家都諗到個畫面，分開嘅決定係嗰期大家最合拍。」她跟前夫是再見亦是朋友，相遇時彼此都是對的時間遇上對的人，在不同事業階段都發揮到作用。
主持愛情信箱
芷珊網上閱讀平台已經運作，她負責《她來自江湖》專欄，之後會重寫經典愛情小說《咖啡樹》2020年版，同時主持《愛情江湖信箱》，幫助迷途小羔羊︰「我都睇好多愛情心理學嘅書，加上我嘅經歷大家都清楚，感覺親切啲。」