陳山聰B仔陳霆軒（Jaco）上月出世，山聰即變成晒B暖爸， Jaco仔噚日剛好滿月，山聰就貼咗一家三口合照，得到唔少圈中好友祝福。而黃祥興前日亦晒出同孻仔Damien嘅半歲大生日相，齊齊切蛋糕，相當溫馨。
完美情人
溫碧霞（Irene）前日54歲生日，一家人約埋Irene嘅同學一齊出海慶祝，Irene着上橙紅色泳衣，同老公Kenny咀嘴，佢仲留言讚老公係佢嘅完美情人，冧死人！
留家操肌
疫情下大家減少外出留家避疫，袁偉豪就做咗個好示範，噚日佢喺Ig上載咗一條58秒片段，佢赤膊上陣，着住條黑色短褲，大騷肌肉喺屋企嘅露台做掌上壓，1分鐘內共做咗25下，總算合格啦！
Hea做運動
57歲圈中富婆關之琳疫情下未有偷懶繼續喼弗，佢喺1.5億半山豪宅大廳做運動，並由愛犬陪伴做伸展動作，不過有網民就彈佢動作唔正確，要上身保持挺直先啱喎！
