【武肺再爆發】
【本報訊】政府強推全日禁食令進退失據，令一眾打工仔「踎街」食飯全城憤怒，措施自周三生效不足48小時，昨起食肆恢復在早、午市可以堂食，打工仔用膳總算有瓦遮頭。有市民直斥當局朝令夕改，應「諗清諗楚先好做」，又指毋須踎街食飯總算「有返基本嘅尊嚴」。惟食肆仍需限制食客數目及每枱人數，有職員大嘆生意大減七至八成，叫苦連天。
全港食肆昨起恢復早午市可以堂食，但每枱上限兩人、入座率上限五成。寫字樓林立的灣仔區，午膳時間到食肆用餐的市民不多，部份食肆更是「小貓三、四隻」，餐廳內食客亦保持一定距離。深水埗情況相若，不少食肆人流明顯大減，酒家及茶餐廳均未見大量食客。
茶餐廳職員陳先生表示，生意大跌最少七成，全日禁堂食更慘，「外賣都冇人叫，只得兩、三單，做返堂食先有返啲生意，每張枱坐兩個人，中間加隔板，至少可以做熟客生意。不過夥計都要出糧，維持到舖租，打個和都算偷笑。」他批評政府朝令夕改，「唔好成日後知後覺，出咗（政策）有問題又改返之前咁，搵着我哋嚟搞，到時要裁員，又冇補助，真係好嬲！」
食肆多限制 生意減七成
燒臘店的職員蕭先生亦嘆生意慘淡，「堂食都冇用，少咗七成生意，得十幾個客，外賣都係賣咗幾盒飯，政府造成呢個結果，（政策）日日都唔同，政府高官個個高薪厚祿，應該聽民意，唔好一意孤行。」另一間食肆的女店東劉女士稱，雖然昨日恢復堂食「有返人氣」，但生意也跌了三成。
政府之前禁止食肆全日堂食後，開放全港各區社區中心，供有需要的市民入內用膳，惟措施亦出現甩漏。其中銅鑼灣社區中心因有凳無枱被詬病，荃灣梨木樹社區會堂樓上的康樹樓更已爆出確診個案，但政府內部疑沒作好協調，民政事務總署之後才將開放地點，改為石圍角邨的社區會堂。
有市民昨恢復光顧餐廳，食客劉先生直指：「（政府）當市民唔係人，恢復堂食，市民總算得到最基本嘅尊嚴，唔好連食飯嘅尊嚴都冇，政府一日唔封關，一日唔搞好衞生，一日都係煩！」另一名食客何先生批評政策朝令夕改，「政府諗清諗楚先好做！」食客周先生亦指恢復堂食好得多，批評當局政策似乎跟窮人作對，「要人踎喺街邊食，點樣食？都唔知邊個諗埋呢啲屎橋出嚟！」