之前左丁山寫過建制派未選先怯，怕在9月6日立法會選舉敗陣而諸多造作，先由藍絲發動聯署要求特區政府推延選舉，跟住人大常委譚耀宗出聲，話疫情嚴峻，住在大灣區嘅香港選民返唔到嚟投票，可能要將立法會選舉延後。好嘞，到各黨派提名候選人，曾鈺成就倡議立法會選舉押後一年。又畀左丁山貼中施展DQ絕招，閃電推出，7月25日就有選舉主任詢問泛民候選人諸多問題，只給予不足24小時回覆，分明係預置「殺人刀」。
選舉主任咁快開槍，將來特區政府定會有「論功行賞」，為免走漏人地一份功績，要詳細寫低佢地名字，唔好走漏，照文匯報報導，選舉主任有五位最快有行動：
（一）新界東地方選區選舉主任楊蕙心
（二）新界西地方選區選舉主任黃展翹
（三）九龍西地方選區選舉主任梁子琪
（四）香港島地方選區選舉主任黃智華
（五）法律界功能組別選舉主任莫君虞
呢五位勤力用功嘅選舉主任在7月25日星期六分別向十名泛民立法會參選人發信，提問有關是否真誠擁護基本法、保證效忠香港特區等等等，限期在7月26日星期日限期前回覆，時間十分短促，充份證明選舉主任們努力奉公、放假正常工作，非一般典型公務員，大家不妨記住五位名字，一年半載後睇吓佢地是否升官？當然，其他選舉主任相信同樣會努力工作嘅。
曾鈺成說延期選舉一年，連同路人湯家驊都認為法律上不可行，立法會選舉日期已刊憲，如何可以更改？只能根據「立法會修例」第44條，即特首可以將選舉延期14日！湯家驊到底係大狀，不敢違背現行條例，之不過曾鈺成係政客，只講政治，不講法律，正如一啲中環deal maker諗到一條妙計玩財技，但公司律師話法律上未必許可，老闆就會講：「咁高薪請你做乜，同我死掂佢！」（按：左丁山曾親耳聽過呢類說話。）曾鈺成係政治師爺款，話唔定西環會受落，下令相關人等：「延期就延期，你地死掂佢！」老實講，如果諗住實贏，講咁多嘢做乜噃，仲要元老級人馬譚耀宗、曾鈺成厚住面皮嚟講，加埋選舉主任閃電出擊㖭。哈，居然有人死掂佢，話將延期選舉之事交畀人大常委決定喎，識自閹而自肥，可以考試第一。