武漢肺炎第三波大爆發，香港人因為咁搞到食啖安樂飯都唔得，究竟係咪人禍居多呢？之前政府死撐豁免檢疫冇問題，但原來立法會議員田北辰月中已去信食衞局長陳肇始，叫政府堵塞貨船船員等等多種人士嘅豁免檢疫漏洞，以免令病毒周圍走！ 但陳肇始竟然好似唔明咁，噏堆唔關事嘅嘢當回應。
田二少㷫爆：病毒唔會走
田二少對政府豁免多種人士檢疫做法好不滿，話香港猶如船員「換更天堂」，畀佢哋喺社區走來走去，增加疫情傳播風險， 所以佢早喺月中要求政府公開各類豁免人士數據，停止免檢疫人士病毒測試嘅豁免，一定要喺機場或碼頭攞到呈陰性報告先可以出社區。
點知陳肇始似乎唔明重點，答佢豁免人士好快走，唔一定需要做檢測嘅，田二少好㷫話豁免人士好快走，但唔代表佢唔會將病毒帶嚟香港喎，病毒嚟咗就唔會走嘞，所以做病毒測試係基本啦。 雖然離地政府未必聽，但田二少未死心，話會寫信畀林鄭，倡政府實施「點對點」安排，規定船員無論經機場定貨輪到香港，都先搭政府安排嘅車送往機場中轉站，等待上機或者上船，唔畀喺社區度走嚟走去，希望減低疫情傳播。