畀左報攻擊為「戴妖」嘅港大法律學院前副教授戴耀廷，自從話唔再搞民主派選舉協調，呢個星期又俾一班港大校委無視程序公義通過炒魷，戴教授之後回應話呢個結果係意料之內，仲話雖然離開港大嘅崗位，但佢對法治嘅研究同教學工作唔會停落嚟。呢頭講完，佢已經坐言起行，星期三開咗Patreon賬戶，開宗名義講「為香港法治的重生而繼續抗爭」。
月捐者可同戴耀廷傾偈
講到Patreon呢個網上平台嘅KOL，人稱「燈神」、「燒山」嘅蕭若元算係大家熟悉嘅成功個案，佢擁有接近2.6萬個訂戶；戴耀廷就一日多啲吸引到過千人課金，走勢非常凌厲。
八方睇過戴耀廷開設咗三級課金方案，入門級每月10蚊美金，會收到佢喺法治研究同教學工作上嘅最新資訊，實行同佢一齊關心香港法治嘅重生；升級版每月25蚊美金，課金者會獲邀參與同香港法治有關嘅講座或者工作坊，實行一齊為香港法治嘅重生而努力；終極方案每月50蚊美金，可以同戴耀廷商討點樣令香港法治重生，真係唔只出錢，仲有機會出埋力，有機會為香港法治而戰。
李八方