效力中超深圳佳兆業嘅英籍港將戴偉浚，噚晚喺中超第二輪對上海申花嘅賽事退居後備，到下半場先獲派上陣，表現唔錯，仲喺補時階段博到12碼，幫球隊追至2:3，可惜都唔能夠平反敗局。
上場大炒廣州富力嘅深圳，噚晚喺大連賽區對上海申花，教練鄧納東尼喺大連體育中心變陣出擊，收起上場正選嘅戴偉浚，結果半場落後0:1。
下半場後備上陣嘅戴偉浚表現較上場進取，更多參與進攻令深圳中場有明顯優勢，不過48分鐘又失多粒，踢到50分鐘戴偉浚禁區外施射俾申花門將曾誠托出底線，三分鐘後，馬里為深圳破蛋，追至1:2。63分鐘，申花嘅南韓前鋒金信煜主射12碼得手，助球隊領先到3:1。戴偉浚喺73分鐘禁區內有射門機會，但俾對手馮蕭霆頭槌解圍。到補時階段，戴偉浚殺入禁區俾上海球員推跌獲判12碼，馬里主射追至2:3完場。
同晚上演嘅廣州打吡，港將陳俊樂效力嘅富力主場對恒大，正選上陣嘅樂仔踢足全場，不過喺71分鐘就食咗面黃牌，最後富力亦以0:5大敗，開季連輸兩場，一球都入唔到。