【本報訊】全日禁堂食令市民被迫街邊吃飯，政府昨日起「補獲」開放全港19間社區中心作「公眾食堂」，但無助平息「飯民」滿肚怒火。有市民不滿政府「當我哋馬騮咁玩」。有地盤工人痛斥高官不知民間疾苦，「叫佢一個司長級官員陪我哋做地盤一日，唔使做任何嘢戴口罩企喺度，睇佢做唔做到」。
政府社區中心隔涉人流少
政府開放的社區中心每區只有一間，記者於午市時段觀察，到場午膳的市民人流稀少，當中灣仔街市地下低層的灣仔活動中心，昨午只有約10名市民用膳；西營盤社區綜合大樓在西營盤高街，位置隔涉，職員稱只有約十多人進內用膳。對於政府的措施，有到場吃飯的市民稱：「仲會有期望咩？唔做衰都偷笑啦」。
民間多處昨日主動開放地方供市民開餐，其中一家教堂灣仔天主教聖母聖衣堂，有不少市民入內進餐。司鐸羅國輝神父指出，政府社區會堂離地盤遠，步程至少15分鐘，工人不可能的士、巴士或港鐵抵達，步程遠也剝奪工人飯後休息時間，他促請官員度政策要從人性出發，「嗰啲涼薄嘅說話唔該唔好講啦，去郊野公園？個腦用嚟做咩㗎？收咁多錢一個月，回水！」
對於政府宣佈再恢復午市堂食，到教堂吃飯的補習老師李先生稱，「佢（政府）似係自己都唔知道自己做緊乜，如果你真係覺得正確嘅，應該嚟緊七日都係咁，即係佢心底裏都知道呢樣唔係解決辦法，所以咪跪低」。另一地盤工洪先生抱怨：「政府當我哋馬騮咁玩」，他前日也是去公園食飯，「又多蚊、又侷、又落雨，食唔落飯，你試吓政府（官員）自己去街上食飯，成身都係汗，點食呢？」地盤工人駱先生昨亦致電電台節目大罵政府高官在決策前無考慮過基層工人苦況，「叫佢一個司長級官員陪我哋做地盤一日，唔使做任何嘢戴口罩企喺度，睇佢做唔做到」。
昨日市面仍有不少市民擠在公園吃外賣，在旺角排隊買外賣的市民Cindy指出，相信無論政見是黃或藍，都不會支持政府的抗疫措施，「由醫護叫封關，到今時今日免檢疫人士，一般市民都諗到嘅嘢，點解官員收咁高人工、受過所謂嘅高等教育都係諗唔到？」
多間民間食堂表明，雖然政府已開放全港19間社區中心作飯堂，又恢復日間堂食，但會繼續開放場地，方便有需要的打工仔。