周三意甲上演多場尾二一輪賽事，已封王嘅祖雲達斯竟爆冷作客0:2不敵卡利亞里。射手基斯坦奴朗拿度（C朗）今場10次攻門都入唔到波，喺射手榜上已經落後同日再有入波嘅拉素射手恩莫比尼四球，睇嚟想首奪意甲神射手都凍過水。恩莫比尼唔止大有機會力壓C朗，仲以35球升上歐洲金靴獎射手榜首位，超越已經聯賽收「咧」嘅拜仁慕尼黑前鋒羅拔利雲度夫斯基。
已提早封王嘅祖記今仗八分鐘就失守，主隊嘅費達歷高馬泰路禁區內橫傳，盧卡加利安奴門前撞入，為卡利亞里先開紀錄。上半前補時階段，基奧雲尼施蒙尼禁區頂射門得手，助主隊領先到兩球。
射10腳食白果輸畀「里」
落後嘅祖記下半場不斷反撲，可惜球隊全場34次攻門都無功而還，當中C朗射足10次都冇辦法破蛋，最終祖記以0:2不敵卡利亞里。祖記煞科戰對手係第五位嘅羅馬，相信C朗要追射手榜同恩莫比尼嘅四球差距難度好大。上季登陸意甲嘅C朗全季入咗21球，唔夠入26球嘅森多利亞老將加利亞雷拉失落意甲神射手寶座，雖然今季C朗已經入到31球，但又撞正大勇嘅恩莫比尼，睇嚟C朗好大機會連續兩年失落神射手寶座。
伊巴首位雙米蘭50+
恩莫比尼喺同日拉素主場2:0擊敗布雷西亞嘅賽事中再有1球進賬，連續四場有波入之餘，喺煞科戰前累積35個聯賽入球，好大機會拎今季意甲神射手之餘，仲已經超越德甲神射手羅拔利雲度夫斯基嘅34個聯賽入波，登上歐洲金靴獎排名第一位。由於其餘歐洲三大聯賽已經完季，只要煞科戰C朗追唔到同恩莫比尼嘅四球差距，恩莫比尼就勢將打破美斯過去三季嘅壟斷，首奪歐洲金靴獎。另外，只要恩莫比尼喺下輪作客拿玻里再入多粒，就可以追平希古恩喺拿玻里創下嘅意甲單季最多入球紀錄。
另一位意甲神鋒伊巴謙莫域，喺AC米蘭作客森多利亞場波梅開二度，協助球隊4:1大勝對手，助球隊保持復賽後不敗戰績。伊巴嘅梅開二度，更令呢位38歲射手成為史上首位為AC米蘭、國際米蘭都入過50個聯賽入球嘅球員，當中06至09年，伊巴3季為國際攻入57球，今次重投米蘭攻入九球，合計過去嘅42球，已為米蘭射入51球，佢賽後亦表示：「啲人話我又老又攰，其實我熱完身咋，我好似電影《奇幻逆緣》嘅Benjamin Button一樣，永遠唔會老，只會越嚟越年輕。」
