近日各位定看過網上瘋傳一條的士車cam片。
片中一操不純正粵語的中女乘客，聽得電台正播放林鄭講話，火起來馬上要求轉台，司機拒絕……
這並非單一事件。其實類似狀況時有出現，不過與以上的女乘客遭遇有點不同──當然，還不必忍受個樣，尤其是鬼鼠閃爍大細眼加「赫赫！」冷笑，已是萬幸，但香港人中，很多是光聽把聲已經把幾火，失控大罵，黃藍皆苦大仇深！
另一架的士就發生如下詭異事件：──
中女：「乜意思呀你？」
司機：「你話轉車吖嘛？」
「我叫你轉台咋喎！你明唔明我講咩呀？」
「而家唔係卡拉OK你話聽咩台就咩台。」
「我唔想聽佢把聲，我叫你轉台唔駛死係嘛？」
「你而家發乜嘢脾氣呀小姐？」
「林鄭月娥正一臭×嚟㗎！」
「佢臭關我咩事呀，關你咩事呀？」
……
中女急叫下車，但司機要照跳錶收費，爭持吵罵一輪，因非失職違例，乘客憤然付紅底，收回找贖，一毛錢也不能少。
就在找贖交收期間，一陣陰風，閃入後座。
司機開車，耳畔還有中女罵罵咧咧之聲：「喂！有冇搞錯呀，你唔好去死……」漸遠。
司機問：「先生去邊度？」
那看來有60多70的乘客：「仲有邊度好去？向前啦，我想聽電台散吓心唧。」
「識貨！」司機一瞧後座：「好聽㗎，好頂癮㗎，條女飲大咗，聽落去佢就知千載難逢嘞！」
老人家木然道：「佢又唔駛死，不過我就走唔甩。」
「阿伯，冥通電台有特備節目呀，係林鄭把聲，佢響地府懺悔……」
（明續）