曹查理演出過《整蠱專家》、《精裝追女仔II》等港產片,專演賤男、鹹濕猥瑣角色,後來他索性改為接拍三級片,代表作有《我為卿狂》,撈得風生水起,高峯時期同時拍八部電影。直到2000年後,他開始淡出電影圈,少有在幕前出現。直至最近現年71歲的他應好友苑瓊丹(苑仔)的邀請,為苑仔在香港開電視主持的節目《開工大吉77》擔任嘉賓。
從未戀圈中人
老朋友見面,曹查理和苑仔當然傾得開心,久違了的曹查理「猥瑣笑容」一如當年,重提當年轉戰三級片市場,他直言是因為「條氣唔順」,他笑說:「嗰陣我生得高大又幾靚仔,但成日都做奸嘅,處於半紅不黑位置,最紅反而係志偉(曾志偉)、大口青(王青),佢哋做晒主角嚟打我,我就一於去拍三級片,睇吓佢哋敢唔敢!」又誇口指自己多年來從未與圈中人發生感情,歷史相當「乾淨」。
曹查理憶述當年拍了逾80部三級片,收入相當可觀:「我當時六萬蚊一組,日日開工開足幾年,試過有一次嚟到現場,導演覺得個景唔得,照出糧叫我收工!其實我唔介意人哋點睇,因為最緊要記得我,而且好多女明星都係得遠觀,我就可以同佢哋親近,所以唔抗拒。」
拒為幾萬登台
早已退休嘆世界的曹查理,今次純粹畀面苑仔才出山:「大儍(成奎安)舊時叫我返內地登台,話上去打個招呼就有幾萬蚊,我都唔睬佢!今次苑仔叫到我先出嚟咋,如果苑仔叫我一齊拍三級片,我肯復出,因為呢部一定係笑片,唔會係愛情動作片。」
苑仔表示自己在曹查理心中有一席位:「佢都話圈中朋友唔多,佢最經典嘅鬼故、拍三級片實況都講晒畀我聽,喺訪問佢仲講拍完三級片之後點解決、拍攝嘅細節等,我都唔知個尺度出唔出到街!」