武漢肺炎入侵娛樂圈，相繼有藝人及電台員工確診，日前網台D100下令DJ要戴口罩開咪，但梁思浩卻漠視疫情，堅拒戴口罩，不設防開咪，結果被轟自私。《蘋果》昨日收到消息指因梁思浩企硬拒戴口罩而跟公司吵大鑊，最後他索性劈炮唔撈暫別節目。
新城知訊台執行總監程凱欣及一位員工早前先後確診武肺，曾到新城錄音的鄧達智亦在上周五晚確診，新城隨即封台大消毒，不少DJ及員工即時進行病毒測試。網台D100為安全起見下令所有DJ必須戴口罩做節目，不過梁思浩在大前日卻在沒有戴口罩下，與李麗蕊及陳彥行主持《大家「真」風騷》，當時他自言因語速太快，避免不清晰才不戴口罩。網民鬧爆梁思浩行為自私，但他解釋其實他們並不在公司開咪，而是租用私人直播室做節目，開咪前後全面消毒，聲稱十分安全。
拉低唞氣唔合格
昨日《蘋果》收到消息，指梁思浩因堅拒戴口罩做節目，結果跟D100高層吵大鑊，他索性劈炮唔撈今日起停工。梁思浩昨日回覆《蘋果》，雖然否認吵大鑊，但卻似有怨言：「我同D100唔係員工同僱主關係，只係分賬形式。其實係我要求換人，𠵱家我搵咗鄒攝幫手，佢同行姐、李麗蕊做埋嗰二十幾集。」梁思浩稱自掏腰包租用私人直播室，更用納米清潔，但奈何對方不接受：「其實之後我都有戴口罩做節目，但我拉低露咗個鼻哥窿唞氣，佢哋都覺得唔符合安全標準，既然人哋唔肯退一步，咁我咪自己退囉。」
至於會否不再跟D100合作？梁思浩說：「我唔否定，將來嘅嘢將來再算。我有同大班（鄭經翰）講返呢件事，好多謝佢嘅體諒。我𠵱家專注做兩個電視節目，其他嘢等疫情緩和咗先算。」D100總經理蔡浩樑表示因聽眾投訴他沒戴口罩而有大壓力，梁思浩則說：「香港人有邊個係冇壓力？」
梁思浩昨日在社交網貼出一張戴口罩的相片並留言：「今天心情特別靚。我常說：我們改變不到大環境，但可以改變自己心情！」他又指自己帶環保盒去買外賣回家。之後他也在節目的fb專頁，署名「正能量村長」留言：「三年半來最開心的一天！困難是一種學習！」陳彥行昨向《蘋果》表示會繼續留任，直到這一季完結為止。
唔肯視像做節目
蔡浩樑昨日就梁思浩「劈炮唔撈」回覆：「思浩喺出面錄音室開咪，但試咗幾日效果唔好，噚日同今日佢做節目時，都冇影到自己個樣出嚟，同埋佢戴口罩戴得唔係咁好，有時掹鬆咗。我打畀思浩，叫佢不如戴口罩返嚟公司做，或者用視像做節目，但佢話唔好。」苦勸無效後，梁思浩最後同意暫停找人頂替他，蔡浩樑坦言：「聽眾同我哋反映，我哋都好大壓力，所以叫佢做返個榜樣，但佢話唔適應。」他強調雙方平心靜氣下商量，並沒有吵大鑊。其實新城不少DJ，如薛家燕及葉文輝等，日前亦曾因新城封台而在家以視像做節目，並沒有出現大問題。