只見本來理直氣壯合力捉淫賊的4公主，即使「芬、芳、愛、珠」不好欺負，此刻被偷底褲的鹹濕佬唬得一愣一愣的，一時不敢搭嘴。
赤舌妖上身，得勢不饒人：
「我是國安偵察人員，秘密任務在身，為何我每次只勾到底褲卻勾不到林鄭『底褲口罩』？你們說，為何冇人用政府的8億元大禮？」
平日倀雞的阿芬囁嚅：
「我用過，不過人人話D銅芯有微粒，吸咗傷肺……而且洗過真係會鬆……」
阿愛和阿珠不約而同：「我哋唔信柒婆㗎喇！唔肯封關又放廿幾卅萬人豁免檢疫嚟港周街走播毒，搞到大爆發，佢想討好老懵董博連任之嘛。」
「樓下姊妹個老母響老人院感染死鬼咗，要佢賠命㖭呀！」
忘了捉賊，你一言我一語訴苦：
「我同佢張合照都刪鬼埋，費事眼冤！」
「吓，你哋真係散播仇恨嘅罪魁禍首噃，別有用心，公然尋釁滋事，信口雌黃，醜化尊貴特首，信唔信我『塔』你哋返差館？」
「返差館？」
「我……都係一個休班警。」他把那勾底褲的伸縮木棍揚一揚：「我用伸縮警棍執行任務，天經地義──你哋製造恐慌，違反愛國愛黨守則，與特區政府對着幹，是港獨所為！」
「訓斥」得興起，手舞足蹈，亢奮得口罩也半甩了。
電光石火間阿芬認出他來──
「咦？你唔係早排響我姑仔屋邨偷底褲嗰個乜嘢宗伯？」
4公主怒目圓睜。
「我認得嘞！你個鹹濕佬畀人捉住私了，賠咗8嚿水求甩身……撞鬼你呀忽然間咁好口才？作威作福？省到我哋立立令？」
「扮公安，冒警？呃鬼呀？」
4惡婦把他口罩給扯下來，街坊圍堵……
赤舌妖見被識穿，大勢已去，就把宗伯這condom棄在路邊，揚長而去，在亂世中，另覓宿主。 （完）