雖然近年曼聯喺英超嘅成績麻麻地，但講到人氣同知名度，紅魔係英超仍然係數一數二嘅球隊。英國《太陽報》報道足球網站Footy.com，根據 google trends長期數據顯示曼聯依然力壓今屆英超冠軍利物浦，榮登全球最受歡迎嘅英超球隊。
本來呢個受歡迎程度係取決於電視收視率、社交媒體關注人數，同埋波衫嘅銷售情況，不過Footy.com就根據google trends數據，評估過去10年英超20間球會喺全球嘅受歡迎程度，每間球會只要喺一個國家成為最受歡迎嘅話，就會得到100分，根據呢個計法，曼聯嘅總得分係14,453分，成為英超20隊當中最高。數據亦顯示曼聯喺全球每個大洲都係最受歡迎，至於車路士就以13,280排第2位，利物浦就以11,833分排第3。雖然紅軍只係排第三，但喺亞洲同大洋洲都排第2。至於阿仙奴、曼城、熱刺都喺前列，今季升班馬錫菲聯就排喺末席。