英超賽季啱啱先收「咧」，各隊又已經開始為新球季招兵買馬，一直對查頓辛祖虎視眈眈嘅曼聯，攞到下季歐聯席位之後亦決定出手，計劃開價8,900萬鎊（約8.9億港元）向多蒙特收購呢位20歲翼鋒，但蜜蜂兵團見到紅魔豬籠入水，當然想分番杯羮，英國傳媒就爆料，多蒙特企硬要收足1.1億鎊，仲限曼聯要喺8月10號前完成交易，唔買就過主。
限8月10號前決定
據《每日郵報》指，雖然今夏英超轉會市場到10月5號先至閂門，但多蒙特就想速戰速決。事關查頓辛祖禮拜四就會返到蜜蜂兵團，開始進行季前訓練，佢哋下個月10號會出發去瑞士進行季前集訓，備戰九月中旬就會開鑼嘅德甲新球季。為咗唔好令隊波分心，多蒙特就希望仲有兩年合約嘅辛祖，喺球隊出發前搞掂晒啲轉會問題。
辛祖喺2017年以800萬鎊轉會費，由曼城轉投多蒙特，雖然曼聯已經開出超過10倍嘅價錢去斟介，不過據報多蒙特就嫌唔夠，企硬要收1.1億鎊，少個「崩」都唔得，搞到紅魔主帥蘇斯克查頭都痛埋。《太陽報》講到蘇B為咗應付歐聯戰線，已經向管理層伸手要攞1.4億鎊買人，𠵱家多蒙特咁樣趁火打劫，曼聯真係未必會就範。其實除咗辛祖之外，紅魔重有好多收購目標，包括早前已經講明就算阿士東維拉成功護級，都未必會留隊嘅「英超柏豪」基亞利殊，同埋李斯特城嘅芝維爾。
想買埋「柏豪」同芝維爾
雖然李城領隊羅渣士講明芝維爾係非賣品，但衰在佢哋喺下季只可以踢歐霸盃，曼聯同車路士都想用踢歐聯嘅機會引芝維爾加盟。英超排第五嘅李城本來都有機會出戰下季歐聯，曼城早前因涉嫌違反財政公平原則，俾歐洲足協禁止兩季歐戰，但曼城之後向國際體育仲裁法庭（CAS）上訴成功。CAS啱啱就公開咗份長達92頁嘅文件，證實包括李城、曼聯同利物浦等九間球會，都有向 CAS要求禁止藍月亮喺上訴期間出戰歐聯。