歐聯八月重開，下周六就會喺16強次回合再鬥曼城嘅皇家馬德里竟然收噩耗，就係隊內前鋒馬里安奴戴亞斯確診武漢肺炎。皇馬捧走西甲冠軍後，球員獲准放短假叉電，點知馬里安奴竟喺呢段時間中招，家陣已經喺屋企隔離，冇得操練，但唔使驚病毒會喺隊內傳播，因為球員係自行喺屋企測試，冇接觸過其他隊友。另外，巴塞隆拿中場艾法美路自從落實喺今季歐聯賽事結束後會被賣到意甲祖雲達斯，就一直冇再被主帥施迪安派上陣。據報原本唔想離隊嘅艾法美路好唔滿意，甚至已向球會講明唔會再披上巴塞球衣上陣，意味八月展開嘅歐聯賽事，巴塞中場兵源將進一步削弱。西班牙《馬卡報》指，喺西甲爭標失敗後，巴塞教練施迪安畀球員放假一周，仲叫所有球員周一返球會做病毒測試，以備戰8月主場對拿玻里嘅歐聯16強次回合賽事，首回合打和1:1。仍然係一隊成員嘅艾法美路周一就冇返球會報到，據報佢已要求提前解約。