兩個疑似闊太在電梯內口沫橫飛講選舉DQ，我自動伸長天線收風前看到闊太臉上是張竹君醫生一次都冇戴過的底褲口罩，口罩呈現近日恒指下滑的狀況。底褲跣低唔緊要，口罩跣落人中，鼻翼朝天，令人個心離一離，恐怕鄭市長繼朝五晚六打殘食肆後的再收緊招數，極有可能就係下令出街必須全天候戴住底褲口罩！我的媽，震懾過禁足令柒倍啊。
話說回頭，闊太離罩講DQ主任，指主任唔知乜背景，容乜易益咗班抗爭派後生仔。闊太明顯係天后維景鐵粉，對選舉主任信納唔過。係嘅，選舉主任大晒咩，同樣要照肺，必須跟之鋒一樣公開回答七問題、符合十附件。
第一必答：有冇BNO。二：屋企人有冇打算行5+1。三：詳細交代移民路線包括埋大灣區。四：差人條命也是命，有冇親戚係差人。五：政治連繫屬於乜派。六：最近一次選舉投俾建制抑或泛民。（呢條好重要，凸顯選舉主任會否徇私或者鎅票）七：俾侵侵總統幾多分。（呢條更重要，選舉主任如果唔係戰狼或戰娘，點幫偉大祖國打贏呢場冷戰！）