今季因為武漢肺炎疫情而要大delay嘅英超終於喺周日完結，利物浦雖然提早喺一個月前成功封王，但直至家陣仲享受緊呢次30年一遇嘅喜悅，個人獎項仲不斷拎。隊長佐敦軒達臣先前當選咗英格蘭足球記者協會（FWA）票選嘅英格蘭足球先生，去到煞科日後嘅周一就輪到領隊高普攞威。
高普拎嘅係英格蘭聯賽領隊協會（LMA）頒發年度最佳領隊。考慮到紅軍喺佢率領下，開季後連續27場英超不敗，提早7輪奪冠，幫球隊贏得自1990年以嚟嘅首個頂級聯賽冠軍，最終成績係32勝3和3負得99分，比第2位嘅曼城多成18分，當然係實至名歸。所以，今次有份角逐嘅英冠盟主列斯聯領隊比爾沙、英甲韋甘比嘅主帥安斯禾夫同埋上屆得主嘅錫菲聯領隊韋達，全部都要向呢位德國籍主帥俯首稱臣。
費Sir拍片賀得獎
拎到獎梗係開心，由於呢個獎家陣已經以曼聯傳奇領隊費格遜命名，高普又一直好欣賞費Sir，所以周一領獎後就話：「作為利物浦領隊，我知道咁講唔係百分百妥當，但我真係好欣賞佢（費格遜）。佢係我第一個遇到嘅英國主帥，我哋一齊食早餐，係好耐以前嘅事，我唔肯定佢係咪記得，但我就永遠都記住，因為嗰一刻對我嚟講，就好似見到教宗一樣！」
費Sir亦有喺公佈結果後錄影恭喜高普，仲大爆高普喺當日曼城輸畀車路士而確認紅軍奪冠一刻，凌晨三點半打畀佢報喜：「我哋講緊列斯聯喺英冠過咗16年升返英超，但利物浦上次贏聯賽冠軍就係30年前，今次真係不可思議。你係當之無愧嘅，我會原諒你凌晨三點半叫醒我，話我知你哋贏咗聯賽冠軍！」
上面講嘅係年度最佳領隊，係計晒英格蘭唔同級別聯賽揀一個最勁嘅拎，但LMA傳統仲會分開每一級別聯賽甚至男女聯賽去頒最佳。年度最佳領隊得第四嘅比爾沙就當選英冠最佳領隊；車路士女足主帥艾瑪希絲，就獲選LMA女子超級聯賽最佳領隊，英超最佳領隊方面會另行公佈，相信都應該係高普囊中物。
踢走拉爾拉拿洛夫雲
另外，利物浦捧完盃後已經有兩位冠軍成員功成身退，完成轉會其他球會嘅手續，一個係約滿嘅中場拉爾拉拿，佢已經同白禮頓簽咗三年約，來季會着「海鷗兵團」嘅14號波衫；另一個就係同拉爾拉拿一樣效力紅軍六年嘅克羅地亞中堅洛夫雲，佢就同俄超班霸辛尼特簽約三年，轉會費為1,100萬鎊。