鄧達智靠偏方煲金銀花、甘草飲用自救，還有進食中藥「連花清瘟膠囊」，《蘋果》致電詢問註冊中醫師楊明霞，她表示：「對確診患者，建議搵番專業人士睇返個別嘅體質，睇吓自己係寒底定熱底，係暑熱定風熱，用藥嘅話會精準一啲，如果貿貿然淨係飲啲金銀花、菊花、甘草，都係一啲清熱解毒，驅風熱嘅中藥，就冇咁能夠對症。如果症狀嚴重，病重藥輕反而會令到病情加重。」至於食中藥連花清瘟膠囊，楊醫師稱：「膠囊主要組成有啲驅風熱、清熱解毒卸火嘅中藥。呢類中成藥喺內地有唔少研究，係證實可以紓緩新冠肺炎，同埋可治療到。但係有呢個病盡可能都搵番專業人士，睇返個別體質先可以服用，因為如果個人寒底嘅話食一啲比較寒涼嘅中藥，反而會加重病情。」至於患武漢肺炎飲食上應該如何？楊醫師指：「食一啲清淡嘅食物，少食啲甜嘢、生冷嘢同煎炸野，盡可能少食啲肉類，食多啲蔬菜，可以提高身體免疫力。」
今年3月，國家中醫藥局曾根據數據表示，金花清感顆粒、連花清瘟膠囊等對武漢肺炎有明顯療效，其藥方主要成份有金銀花、甘草等。而連花清瘟是內地生產的一種中成藥膠囊，可用於治療流行性感冒，減少發熱、流涕咳嗽及頭痛等症狀。