喺立法會內會主席選舉期間被工聯會郭偉強拉跌嘅陳志全，早排向郭提私人檢控，單案已去到法庭，八方就唔多講，但郭偉強似乎唔理咁多，前晚喺facebook直播，竟然暗嘲慢必為「菊花先生」，叫聲援慢必嘅市民係「菊花團」，立即惹來網上聲討，狂轟郭偉強涉嫌歧視，而袁嘉蔚、朱凱廸等喺facebook聲援，叫「暴徒先生」郭偉強立即道歉。
網民︰涉性向歧視
郭偉強前晚直播內容，涉及私人檢控案件及法院內外真實情況，其間用「菊花先生」暗嘲提控嘅慢必，質疑有人借案件抽政治油水，又用「菊花團」形容聲援市民，好多網民鬧爆，有網民甚至喺佢facebook留言：「根據社會工作者工作守則第一部份第二條，你作為社工已經涉嫌歧視他人性取向。」有人鬧話已經唔關政見事，「係人品問題。好似你呢啲冇家教，人品極差嘅人，連做人嘅資格都冇。」
慢必亦大鬧郭偉強，話郭作為一名立法會議員、社工，理應受過高等教育，唔會隨意講咁冇教養嘅說話，郭嘅言行只會更凸顯佢嘅人格有問題，慢必話唔會因而感到難堪，只會為對方有失身份感到難過。