前日傳媒界爆出一件狸貓換太子事件，《明報》前記者施嘉雯俾人用咗佢名字做化名，同屈穎妍、馮煒光、「爆咪姐」潘麗瓊等藍絲撰寫《香港顏色密碼》。施嘉雯「被作者」後搵咗負責編輯江迅交涉，但江迅話無能為力，呢件事引起好多行家不滿，大鬧呢個化名「施嘉雯」嘅「資深傳媒人」離譜，仲想知邊個咁冇品！噚日謎底解開！爆咪姐潘麗瓊喺佢專欄自揭自己就係「施嘉雯」，但佢仲死撐話撞名只係巧合，「名字不是任何人的專利」喎！
叫受害人自行澄清
潘麗瓊喺文中話筆名係佢起，又話「文壇上使用筆名很普遍，魯迅就是筆名」，話如果有誤會就澄清，仲講到「名字不是任何人的專利」，批評外界對此事語帶嘲諷、抹黑，甚至牽連同書其他作者，佢仲將個波踢畀江迅，話佢曾一度要求用真名，「但主編要求我其中一篇用筆名」。不過，之前江迅又同真‧施嘉雯話，係作者唔想用真名，究竟邊個先係真？
真‧施嘉雯之後喺fb撰文，話原來佢搵過潘麗瓊傾「施嘉雯事件」，但爆咪姐唔肯認用咗「施嘉雯」個名，只叫施嘉雯自己澄清，真‧施嘉雯話如果唔係有傳媒同KOL幫佢出聲，潘麗瓊唔會自爆，質問係咪「任何人，也可以『被作者』，拋下一句『名字不是任何人的專利』，便可以無敵？」
網民見到潘小姐「名字不是任何人的專利」呢個言論，都大感贊同，即刻用「潘麗瓊」呢個筆名講聲「結束一黨專政」！