「Son姐，政府嘅限聚令，真心係覺得形同虛設，真心希望你可以話醒大家。無論係限制4人、8人一枱，仍然有無數咁多人照樣訂枱 happy gathering，16人18人24人，4人一枱分枱坐。醫生就宣傳叫人減少外出，群眾就話知你照樣happy gathering，真係好激氣！佢哋擔心嘅，係啲現金優惠券要盡快用咗佢，同埋一定要book窗口位影相……」
最新情況，政府全面禁止餐飲業堂食，所以分開4個人坐的gathering經已不可能了！表面上看來你的擔心毋須再擔心，不過就帶來更加多的擔心！
政府的防疫措施沒有最戇居無能，只有更戇居無能！香港人最是靈活變通，冇得去餐廳gathering，去郊野沙灘gathering得，一大班人在家中gathering一樣得，還有很多隱藏在工廠大廈的私竇。禁止餐飲業堂食，結果一大班人圍爐happy，比外出食飯更緊密親密接觸，點樣防？
慘的是整個餐飲行業，尤其是前線服務、洗碗清潔，教手停口停家無隔夜糧的貧苦低收入家庭，如何活下去？
今日起所有人只能家中開飯，要上班的只能帶飯，在辦公室工作的員工可以去邊度開飯？近日網上流傳一張令我心酸到不能的照片，一位中年男士半蹲在快餐店門口隔籬，食物擺在地上，急急開餐。還有一班辛勞工作的清潔工人，頂着40度的炎熱天氣由頭濕到落腳，頂不順中暑送院新聞都有報道，連休息食飯只能躲在垃圾站內喘息進食，還有比這個更不人道的嗎？
因為多了叫外賣，所以垃圾量大增，當中還有食物殘渣湯汁高溫之下發出惡臭，還有被金屬罐頭割傷手，任由傷口發炎照樣開工，名副其實搵命博！點解？因為手腳慢清理不及會被投訴，因為怕冇咗份工冇收入多過冇咗條命！
非常時期，非常艱難，為己為人，懇請各位盡量留在家中，各位老闆盡量安排員工WFH，減低病毒傳染擴散的機會。同心齊抗疫，抗疫同齊心！
張慧敏