新民黨主席葉劉淑儀同袁彌昌嘅恩怨，可能連長江暴雨都沖不褪。噚日佢兩個冤家路窄，撞埋同一日報名參選立法會港島區直選，仲隔空表演「搶老婆」。
早排容海恩話支持葉劉參選，袁彌昌噚日反擊，話得到太太容海恩提名，仲話太太私人層面支持他，葉劉就多謝同黨嘅容海恩支持，寸爆袁彌昌「我唔知佢咩票源」，八方隔空都聞到陣陣酸味。
唔知係咪心有靈犀，葉劉同袁彌昌揀同日同鐘數報名，不過葉劉齊腳先，成功搶先報名同見傳媒。葉劉話對新民黨取得港島一席有信心，但被問到袁彌昌以中間派形象參選，會唔會票源重叠？葉太強調：「我唔知佢咩票源，但我多謝佢太太已表示支持我」。
袁彌昌其後答記者，話知道太太以新民黨副主席身份公開稱支持葉太，但「私人層面係畀咗提名我」，佢向葉劉還拖，話落區時發現唔少中產「搵緊葉劉淑儀嘅替代」，因為去年社會不少事，建制派責無旁貸，特別葉劉身份係行會成員。容海恩情歸何處？前幾日佢公開為葉劉同李梓敬站台，搞到老公喺社交網公開出帖︰「老婆，明嘅。咁我哋打對台吧。」噚日容海恩就真係冇為丈夫站台。睇嚟港島選民直到選舉前，仲有大把花生食。